Dili katiawtiawan ang karsada

Bisa unsa pa ka hanas ang usa ka tawo sa pagmaneho og sakyanan dili gyud kana kasaligan o garantiya nga exempted na sa aksidente sa karsada, gani mao kini ang sagad hinungdan sa mahitabo nga trahedya, pun-an pa sa ubang mga factor nga sagad maghatod sa disgrasya sa mga tawo nga sakay sa sakyanan.

Usa ka grupo sa mga tinun-an sa kolehiyo ang nakasugat og disgrasya sa Transcentral Highway habig na sa Barangay Gaas lungsod sa Balamban niadtong nakalabayng Huwebes sa hapon diin nalimbuwad ang gisakyan nilang SUV nga nisangpot sa pagkaangol sa napulo ka sakay niini ug walay swerte ang babayeng nagmaneho sa sakyanan kay nakabsan gyud siya sa kinabuhi tungod sa kakusog sa impact sa disgrasya.

Sa wala pa nahitabo ang aksidente, nag-video pa ang usa sa mga sakay diin makita ang gahaguros nilang dagan hangtud nakasugat sila og laing sakyanan nga maoy hinungdan nga gikabig sa driver ang manibela ug tungod sa kakusog nahaybol ang sayanan sa karsada.

Sa imbestigsyon sa kapolisan sa Balamban, nasuta nga nangaon lang ang mga tinyn-an sa TCH ug nag inom ginagmay nga maoy gituohan nga usa sa mga nakaingon sa aksidente sa pagbalik na unta nila sa dakbayan sa Sugbo. Klaro sa video nga saba kaayo ang naa sa sulod nga nadayonan sa syagit sa kalisang dihang padung na sila sa disgrasya.

Dili sa gibasol ang mga sakay ug labaw na sa driver kay askidente man gyud ang nahitabo apan leksiyon kini alang sa tanan nga kinahanglan nga focus ug dili maggaragara sa sulod sa sakyanan ug dili disturbohon ang driver kay gamay'ng siypat lang sa hospital o menteryo gyud ang padulngan.

Labaw sa tanan ang pag-inom og alak bisan gamay lang dili gyud himoon kay ang gamay ra ba alang sa tawong nakainom lahi ra gyud, nagtuo siya nga kaya pa apan ang lawas surrender na, mao niy giingon nga hunahuna lang ang gadako.

Sa mga managbarkada kong moingon ang kauban ninyo nga nagmaneho nga dili moinom ayaw gyud pugsa ug labaw na nga dili tintalon kay bisan unsa ka buotan ang tawo kong makainom na mogawas gyud ang tinagoang hambog labi na kong abibahan sa mga kauban.

Mag-imagine ra ba dayon nga nisalmot sa car racing hinungdan nga kusog kaayong mopadagan.

Busa ang pag-amping ra gyud ang hinagiban sa mga drivers panahon sa pagmaneho nga malikay sa peligro.

Iampo nato ang kalag sa namatay nga driver ug ang paspas nga kaayohan sa mga nangaangol aron makapadayon na sila sa ilang pagtungha.

Angayan hinumduman nga ang karsada dili kakomedyahan, naghatag kini og kasayon sa mga moagi apan depende kon unsaon sa paggamit kay gamay'ng sipyat dad-on pa ka ngadto sa lunganan.

Amping lang ilabi na karon nga panahon sa ting uli ngadto sa probinsya alang sa Semana Santa.