Divorce Bill

Napasar gyud sa Kongreso ang balaodnon nga magtugot og divorce dinhi sa Pilipinas. Daghan baya ang mga kongresista nga misupak unta, apan gilupig gihapon sila sa gidaghanon sa mga kongresista nga miuyon.

Miabot og 126 ka kongresista ang mipabor nga ipasar nila sa Kongreso ang House Bill 9349, kun Absolute Divorce Act, nga kon mahingpit na kining balaod, sayon na lang ang panagbuwag sa magtiayon.

Duna lay 109 ang misupak, kay ang 20 ka laing mga kongresista nahisama sa lusay diha sa dagat, nga wa mohukom kon unsay ilang mga baruganan.

Ang isyu sa mga misugyot nga aprobahan ang divorce dinhi sa nasud, nga wa na kuno’y kapuslanan nga ipabilin ang kasagrado sa kaminyoon sa usa ka magtiayon nga wa nay pagtinagdanay sa usa’g-usa.

Timan-i, nga kon mapatuman na ang Divorce Law dinhi sa nasud, ang mga minyo, mobalik na sa ilang pagka ulitawo ug dalaga human nga maaprobahan ang ilang panagbuwag. Sa ato pa, pwede na sila nga maminyo pag-usab.

Aw, karon hinuon bisan og wa pay divorce sa Pilipinas, duna man gihapoy panagbuwag sa magtiayon pinaagi sa gitawag og Annulment of Marriage.

Dunay tulo ka paagi ubos sa New Family Code nga magkabuwag ang magtiayon. Kini mao ang Legal Separation, Nullity of Marriage ug ang Annulment of Marriage.

Sa legal separation, magpabilin gihapon nga dili makaminyo ang bana ug asawa bisan og gitugotan na sila nga magbuwag, apan sa Nullity of Marriage, ug Annulment of Marriage, makahimo na pagminyo pag-usab.

Sa petition for Nullity of Marriage, kinahanglang pamatud-an sa petitioner nga ang ilang kasal uban sa iyang asawa, o bana, nahimo pinaagi sa ilegal. Sama kon menor de edad pa ang usa ka party, kon ang nagkasal kanila wa diay tuguti nga makakasal, ug daghan pa.

Pananglit nagpakasal mo sa usa ka mayor, unya ang kasal didto gihimo sa dapit nga dili na apil sa iyang teritoryo, aw maisip nga “void” ang kasal.

Sa Annulment of Marriage, ang “most abused term” nga gigamit sa mga abogado sa petitioner, mao ang “psychological incapacity” sa usa ka party.

Sama nga palahubog, dili mohatag og kwarta sa asawa isip suporta sa pamilya, kusog mangulata. Gani, kon ang bana masayod nga ang babayeng iyang gipakaslan may anak diay sa iyang pagka dalaga, unya gihilom ra kini kaniya, basehanan na kini sa pakigbuwag.

Bitaw, kon ako’y inyong pangutan-on kon pabor ba ko sa divorce, ang akong tubag, kon dili na gyud magkauli pa ang maayong pagtinagdanay, nganong magtipon pa man ug mag-ilhanay nga asawa’g bana?