EDITORYAL - Lokal nga shipbuilders

Way salig sa  Made in the Phl Pirmeng mabasa , makita, ug madungog sa mga balita ang mga pulong: Kamao sab mohimo niana ang mga Pilipino, apan unsaon man wala may suporta ang gobiyerno.

Ang gobiyerno sa Pilipinas nagsalig sa mga ekipo, mga sakyanan, kagamitan ug uban pa gikan sa laing mga nasud nga ilahang pamaliton. Tinuod daghan sa mga butang nga gikinahanglan dinhi sa nasud dili kayang buhaton  dinhi bisan dunay daghan nga talentadong mga Pilipino.

Usa na niini kaning mga barkong gikinahanglan sa Philippine Coastguard, Bureau of Fisheries and Aquatic Resources, Maritime Police ug uban pa nga diin ang ahensiya sa gobiyerno nagkinahanglan og sakyanan sa dagat aron mabuhat ilang mandato.

Dili nalang nato pugson nga anhi sab sa Pilipinas himuon ang mga barkong panggubat para sa Philippine Navy tungod kay lahi kini ug espesyal nga matang ang maong mga barko ug sensitibo sab ang mga ekipo ug mga dapat niini nga nagkinahanglan og congressional approval sa nagkadaiyang mga nasud kon asa kini napalit.

Apan dunay daghang mga lokal nga shipbuilders sa Pilipinas nga kayang mohimo og mga patrolboats, logistics boat, tugboats ug uban pa. Apan pirme lang silang palawayon kay didto man sa abroad mopalit.

Hinuon duna nay pipila ka mga barko sa BFAR nga ginama sa Pilipinas apan bisan pa niini dili pa gihapon sila prayoridad isip suppliers.

Walay salig sa ilang trabaho o kalidad, o kuwang lang gyud og panglantaw ang mga opisyales sa gobiyerno sa kaugmaon sa industriya sa paggama og barko sa Pilipinas?

Ang Pilipinas hagbay rang nagtinguha nga makabaton og kapabilidad pagbuhat sa mga gikinahanglan niini aron dili magsalig sa supply gikan sa laing nasud.

Mao kini ang giduso kaniadto nga Self Reliance Defense Posture Program nga hangtud karon wala hatagi og suporta. Ang SRDP usa ka maayong programa tungod dili lang kini masaligan kun magkagiyera  sa kalibotan, magamit kini kun dunay pandemiya sama sa nahitabo sa COVID-19, ug katalagman , numero unong maapektahan ang transportasyon sa tanang mga produkto ug posibleng maipit ang nasud kun mahurot ang supply nga gikinahanglan para makapadayon sa ilang mga buluhaton.

Kung saligan lang unta pirme ang lokal nga kapabilidad, mas molambo pa gyud unta kini ug mailhan sa kalibotan ug sa samang paagi makahatag og daghang trabaho sa mga Pilipino.