EDITORYAL - Maharlika funds i-invest og tarong

Aprubado na sa nakalabay nga tuig ang kontrobersiyal nga Maharlika Investment Fund nga nahimong usa sa mga prayoridad sa kasamtangang administrasyong Marcos. Daghan ang naglaum nga pinaagi niini, mapundohan na unya ang uban pang mga proyekto sa gobiyerno nga nagkulang niini.

Ang MIF gigahinan sa gobiyerno og dakong puhonan, bilyones ka pesos kini. Matud pa ang pundo gamiton pag-invest sa mga negosyo aron ang ginansiya maoy gamiton sa mga proyekto sa gobiyerno.

Sayod ang tanan nga daghang mga proyekto sa gobiyerno ang nadelatar pagpatuman tungod sa mga kakulangon. Kini sama sa mga pangpublikong tambalanan, sa edukasyon, imprastraktura, agrikultura ug daghan pang uban nga kung duna ray pundo makatabang gyud og dako sa katawhang Pilipino.

Apan mag-unsa ra man ang pundo sa MIF kun dili kini gamiton sa katuyoan? Busa kinahanglan kining ibubo sa mga negosyo aron motubo. Apan dili lang unta bisan unsa o bisan asa lang nga negosyo kondili kadtong negosyong bisan kinsa pay mamahimong presidente sa Pilipinas sa mosunod nga mga katuigan padayong magtubo.

Usa niini ang pag-invest sa pundo sa overseas nga mga negosyo, maayong mangita ang gobiyerno og mga dagkong kompanya ilabi na ang may kalabotan sa teknolohiya, pagkaon, siyensiya ug bisan sa defense industry.

Dunay mga dagkong kompanya nagkadaiyang mga nasud nga nangita og kapartner sa ilang mga umaabot nga programa ug proyekto nga gipaabot nga mokita og dako.

Usa sa sanglitanan niini mao ang nasud sa Indonesia nga nakig-partner karon sa Korean Aerospace Industry sa ilang KFX-Borramae 4.5th Generation Fighter Program.

Daghang nakuhang kaayohan ang Indonesia gikan sa partnership sama sa technology transfer , tsansang maoy prayoridad sa mga defense articles sa South Korea nga ilang gikinahanglan ug uban pa.

Kun ang Pilipinas sundon ang gibuhat sa Indonesia, mamahimo nga ibutang sa kasabotan nga anhi sa Pilipinas buhaton ang gikinahanglang mga parte o raw materials sa produktong buhaton.

Pinaagi niini, gawas nga dunay bahin ang Pilipinas sa halin sa produkto, sa samang higayon dunay daghang Pilipinong makatrabaho sa pabrika o plantasyon sa raw materials nga gikinahanglan.