Inamahan nga pag desiplina sa Magtutudlo

Nabutang sa alanganin ang usa ka matutudlo sa Don Sergio Osmeña Memorial National High School human nagkuhaan og video ang iyang pagdapat sa usa ka tinon-an sa Grade 8 ug nag-viral kini human gi-upload sa socia media nga nakaabot na gani sa Department of Education diin kasamtangan nga giimbistigahan karon.

Nasayran nga napuno na ang magtutudlo sa sige og pabadlong sa naasoy'ng tinun-an nga giingong nag-cutting classes kay nangaligo uban sa mga barkada sa dagat dapit sa SRP nga nakamugna og tumang kabalaka sa magtutudlo kay simbako nga dunay dautang mahitabo ang tunghaan usab ang adunay tulobagon. Dili pa igo gibuyag kuno ang tinun-an nga nagbutang og ariyos sa dunggan nga higpit gidili sa eskwelahan. Nagtubagtubag naman hinuon kini ug wala gyud mopatuo. Niadtong higayona nagpasulabi na seguro ang inamahan nga pagbati sa maestro nga nakaingon siya nga iyang anak ang nitubag tubag kaniya ug iyang gipatilaw sa disiplina. Ang video milanat lang og pipila ka segundo o kadtong gidapatan lang sa magtutudlo ang tinun-an ang gi-upload sa social media, wala maapil ang panghitabo sa wala pa nahitabo ang pagpanapat. Kong tan-awon ang video og tarong mora’g dili man kusog ang pagkadat sa lawas sa tinun-an. Gani matud sa principal sa eskwelahan wala man makamugna og lagum sa parte sa lawas nga naigo sa pagdapat.

Mireklamo ang mga ginikanan sa bata kay syempre bisan kinsa naman seguro nga ginikanan matandog gyud sa gidangatan sa anak. Busa nangita sila og katarungan sa gidangatan sa ilang anak. Nagkaatubang na sila kauban ang school principal ug ang legal officer sa DepEd diin nangayo og pasaylo ang maestro sa iyang gihimo ngadto sa tinun-an. Apan mora'g nagduhaduha sa pagdawat ang mga ginikanan ug ilang gipaabot ngadto sa regional office ang kaso.

Sa ingon niini nga panghitabo, parehong adunay sayop ang magtutudlo ug ang estudyante. Una ang tinun-an nga nagpakita sa iyang kawalay respeto sa iyang maestro nga maoy nakahaling sa kasuko niini ug nadapatan na hinoon siya. Apan basin baya og dunay factor nga nagtukmod sa tinon-an nga magpabadlong aron makuha niya ang attention sa mga tawo sa iyang palibot, dili man sa eskwelahan apan posible sa ilang pinoy-anan. Samtang ang maestro sayop pud siya sa pagdapat sa iyang tinun-an kay walay justification nga mohaum o gamitong rason sa pagdapat sa usa ka bata tungod lang kay naglagot na ka. Kong dili madala sa estorya, ipatawag sa principal kauban ang mga ginikanan aron didto estoryahon ug ang ginikanan na niini ang modesiplina sa ilang anak.

Bisan pa man og maayo ang tumong sa maestro dili angayan nga magpauiipon sa emotion nga mosangpot sa kalimot nga mohimo og mga butang nga basolan sa kauwahian.

 In fairness sa maestro, 27 ka tuig siya sa serbisyo ug maayo ang iyang record, karon lang namantsahan tungod sa iyang pagpakabana sa tinon-an ng giisip niyang anak. Zero tolerant ang DepEd sa tanang matang sa pagpasaki sa mga tinon-an, apan mas maayo seguro tan-awon nila ang sirkumstansya nganong nahitabo kini.

Ang nahitabo nagbilin og leksyon sa magtutudlo, tinun-an, ug mga ginikanan nga unta maghiusa sa pagmatuto sa kinaiya sa mga tinun-an aron masabtan ang ilang posibleng kahimtang kay sa ingon niini mas moluag ang pagsabot nganong ingon niini ang gipakitang batasan niining bataa.