EDITORYAL - Job-ready graduates

Makalitan na sab niini ang mga ginikanan sa umaabot nga school year 2025-2026 nunot sa ipatuman na nga pilot run sa bag-ong curriculum  sa senior high school nga ang tumong pag-prodyus og job-ready nga mga graduates.

Si VP Sara Duterte-Carpio kinsa kalihim sa Department of Education miingon nga gikinahanglang usbon ang kasamtangang curriculum sa senior high school nga matud dili job-ready ang mga produkto.

Kung mao gyud kini ang katuyoan maayo kining pakpakan ug suportahan kay ang tumong aning pagpatungha sa mga kabataan mao man ang pag-andam kanila aron sila makakita og desenteng trabaho ug mapuslan sa nasud.

Angkunon man o dili, duna gyuy kakulangon ang kasamtangang curriculum dili sa teoriya kondili sa mga ekipo, laboratory, ug mga magtutudlo.

Mas daghang mga eskuylahan nga naghatag og senior high education ang kuwang og mga pisikal nga gamit pag-andam ug pagtudlo sa ilang mga tinun-an aron sila mamahimong job-ready kun sila mahuman sa pagtungha.

Kadaghanan puro lang teoriya. Subo lang nga kadaghanan sa mga kuwang niini mao ang mga public schools nga unta ang gobiyerno may nipatuman aning K to 12.

Ang kulang gyud sa kasamtangang K to 12 system mao ang mga magtutudlo, mga ekipo, makina, laboratoryo ug uban  pa nga mahikap, makita, magamit sa mga estudyante sa ilang pagtuon dili lang pulos gikan sa libro.

Kaning bag-ong curriculum sa senior high kinahanglan nga maka-prodyus na gyud og tinuoray nga job-ready nga mga graduates sama sa pagpreparar kanila nga makatrabaho dayon sa mga Business Outsource Process o mga call center companies.

Sa siyensiya, medisina, pagkaon, agrikultura, maritime, construction industry ug mga technical educations aron dili sila maihalas kun gustohon nilang motrabaho nalang o motrabaho samtang nagpadayon pagtungha sa kolehiyo aron kab-uton ilang mga damgo.

Ang kinahanglan sa mga kabataang Pilipino dili lang dapat gikan sa teoriya o imahinasyon kondili pisikal nga kamahoan ug walay laing makahatag niini kondili ang gobiyerno mismo.

Himuong competitive ang public senior high school sanglit dili tanan kayang mobayad og pribadong mga eskuylahan nga utro pud kuwang sab og mga gamit sa pagtudlo.