Pungkol ang taga-DSWD?

Agi’g reaksyon sa sugyot sa Department of Agriculture nga manghatag na lang ug bugas ngadto sa mga 4Ps beneficiaries, gibarugan sa DSWD ang ilang posisyon nga mas “practical ug tunhay” kon kwarta nga P600 matag buwan ang ipanghatag isip rice subsidy aron dili magkalisod-lisod ang mga benepisyaryo. Dili man kinahanglan mopili unta ang DSWD kon bugas o kwarta ba ang ihatag kay modawat ra gyud ang katawhan kon ang duha maoy ihatag. Matud pa sa akong amigo, “Basin pungkol ang taga-DSWD mao nga dili sila pwede modawat og duha ka kaayohan.” Madahaan!

Apilan og emperador

Mipasaka og balaodnon si Cagayan de Oro Congressman Lordan Suan kansang tumong mao ang paghatag niadtong mga “heartbroken” nga empleyado og unpaid leave. Sumala sa mga psychologists, adunay seryosong epekto ang pagka-broken hearted. Dili kaha mosamot kasakit ang balatian sa madesperado kon mo-leave siya ug mag-inusara na lang human gibuwagan sa iyang minahal. Hangyo sa akong amigo, “maayo unta momandar usab ang balaodnon nga hatagan og incentive nga kwarta ang na-heartbroken aron naa siya’y ikapalit og Emperador nga maoy molunod sa kasakit sa nagmaoy niya’ng kasingkasing.” Ginhawa Delpn!

Dili saging, abaka kana

Giawhag sa Department of Agriculture ang mga mag-uuma nga nagtikad sa dili momenus 26,000 ka ektarya nga yuta sa pagpananum gilayon human sila mang-ani aron makunhoran ang epekto sa El Nino sa ilang abot ug mga pananom. Dili na kinahanglang awhagon ang mga mag-uuma kay, tungod sa kasinatian, sila mismo nasayod na kon kanus-a angayan tikaron ang umahan. Makapahinumdum sa agriculture graduate nga anak nga sa dihang mipauli na sa ilang probinsya, iya dayon gisaway ang iyang amahan nga sayop ang pagtanom niini sa saging maoy hinungdan nga wala kini mamunga. Yano’ng mitubag ang amahan nga, “Dili man na saging Nak, abaka man na”. Pagkatoytoy!

Magbutanga og ka-king

Gikataho nga nagbinayloay og hagit pinaagi sa radio ang China ug Pilipinas sa dihang ang Bureau of Fisheries and Aquatic Resources (BFAR), kinsa mipahigayon og humanitarian mission sa West Philippine Sea, giwarningan sa Chinese Navy nga mopahawa sa maong lugar. Dili gyud mohupas ang tensyon sa WPS kon magpadayon ang pagpangangkon sa China niini ginamit ang ilang pwersa militar. Sugyot sa akong amigo, “Aron mawagtang ang tensyon sa WPS, inay barko sa navy ang iparada sa China, mas maayo tingale magbutang sila sa WPS og tindahan sama sa Ka-King o ba kaha 138, aron adto na lang mangompra ang Filipino supply missions ug mga mangingisda.” Muleeng!

Military nga nagsayaw-sayaw

Gidid-an na mga military personnel sa pag-gamit sa TikTok taliwala sa kahingawa sa posible’ng paggamit sa pagpang-espiya sa China sa maong application. Ang Tiktok  adunay monitoring and listening capability nga magbutyag sa mga lihok ug gipanulti sa mga mogamit niini. Maayo kay gipanghingusgan na sa military ang pagdili niini. Hinoon, dili tingale kita angay nga mabalaka kay mora’g wala ma’y sekreto nga nabulgar kay ang sagad makita sa mga TikTok app, mga military ug polis ra man nga dagko og tiyan nga nagsayaw-sayaw.  Fezteleern!