Modaghan ang "libakera"

Adunay gipasaka’ng balaodnon si Senador Jinggoy Estrada nga ang tumong mao  ang pagtangtang sa silot nga pagkabilanggo niadtong mahukman nga sad-an sa kasong libelo. Alang sa senador, ang civil damages kon bayad, igo na nga silot niadtong mamatud-an nga sad-an. Mora’g hangpon kining maong balaodnon sa  mga hingtungdan labi na sa mga journalist. Kay dili na man mapriso, makabaton na unya og igong kaisog ang katawhan pagsaway sa angay nga sawayon sa katilingban labi na sa mga opisyal sa kagamhanan nga nagtinonto sa ilang katungdanan. Apan nabalaka usab ang akong higala kay kon mapasar ang maong balaod, basin mosamot na hinoon kadaghan ang mga “Marites” ug  “Marisol”. Madahaan!

“In onion, there is strong”

Alang kang Presidente Ferdinand Marcos, ang pagbuwag sa Mindanao gikan sa Pilipinas usa ka dakong pagyatak sa Konstitusyon ug nga kapakyasan lang ang padulngan sa maong panawagan tungod kay naka-base kini sa sayop nga pagtuo. Daghan tingale ang rason sa mga tigpasiugda sa pagbuwag apan tataw nga dili kinatibuk-ang kaayohan ang nagtukmod niini. Mora’g wala na kanila ang diwa sa panultihon nga “In unity there is strength.” Hinunoa, basin ang binuang nga pagya na ang mipasulabi kanila nga mao ang, “In onion, there is strong.” Pagkatoytoy!

Damay-damay lang

Mipasaka’g resolusyon si Senador Bong Revilla Jr., nga nag-awhag sa Senate Committee on Public Works sa pag-imbestigar sa pagkuyanap sa mga billboards diha sa mga kadalanan sa tumong nga marepaso ang mga kasamtangan’g balaod ug mga regulasyon alang sa luwas nga pagbiyahe sa mga sumasakay ug mga pedestrians. Dugang sa senador, adunay mga natala nga aksidente sa kadalanan tungod kay nalinga sa mga billboard. Matud pa sa akong amigo, makapahibulong nga gipanghingusgan sa senador kining kampanya batok sa billboard. Apan sa una nga nagbansiwag pa ang higante niyang pamayhon sa mga kadalanan, wala niya kini igsapayan. Mao na’y giingon nga, “Damay-damay lang.” Fezteleern!

Pwede ra matulog

Mipagawas og Executive Order ang kagamhanang lokal sa General Luna, Quezon nga nagtugot sa mga single nga empleyado nga makapahimulos sa duha ka adlaw nga “special stress leave” karon’g Pebrero 15 ug 16. Sumala sa maong EO.,  gituohan nga ang Valentines Day makahatag og stress niadtong mga “nag-inusara’ng mga binuhat” busa angayan silang hatagan og kahigayonan nga maka-atiman sa kaugalingon. Apan alang sa akong amigo’ng hamtong nga ulitawo,  di na niya kinahanglanon ang “special stress leave” kay matud pa niya,  “Ngano gud diay og dili maminyo, pwede ra bitaw matulog.” Muleeng!

Karma is real

Gihukasan sa Supreme Court sa iyang pagka-abogado si Emilio Pana, Jr., human masuta nga nakahimo kini’g kalapasan sa Code of Professional Responsibility and Accountability ingon man sa Lawyer’s Oath. Napamatud-an nga naghimo-himo lang  si Pana og mga peke nga annulment papers alang sa iyang kliyente kinsa mihatag kaniya og dakong kantidad aron unta mapahigayon sa tinuoray ang maong  annulment. Sa gibuhat nga pagpangilad ni Pana, inay kaminyoon sa kliyente, ang iya na hinoong pagka-abogado ang na-annul. Karma is real  gyud lage. Saoonz!

Daluz hulga  ni Rama

Giangkon na ni Metro Cebu Water District (MCWD) chairman Joey Daluz III nga hulga siya ni Mayor Michael Rama sa 2025 elections.

Gitug-an ni Daluz atol sa iyang pagbisita sa The Freeman Hot Seat niadtong Huwebes nga seryoso na niyang gikonsidirar ang pagpapili pagkamayor atbang ni Rama. Gani nagsugod na siya sa pagsuroy sa kabarangayan aron mohimo og konsultasyon sa publiko.

Ang pagpanggukod ni Rama niya maoy usa sa bug-at nga rason nganong nakahuna-huna siya nga mopapili sa umaabot eleksiyon.

Dili pa hinuon 100-percent ang iyang disisyon pagpapili, apan iyang giangkon nga anaa na sa 70-porsiento ang iyang hukom nga mokandidato.

Sa unang higayon nadunggan nako si Daluz nga miangkon nga dunay sagol politika ang tinguha ni Rama paghulip niya isip chairman sa MCWD. Tulo ka mga hinungdan ang gitan-aw ni Daluz nganong naghigwaos si Rama pagtangtang niya gikan sa MCWD.

Una, nasuko ang mayor nga iyang gibalibaran ang tinguha niini nga himoong pribado ang operasyon sa water district. Ikaduha, nasuko si Rama nga ilang gibalibaran ang paggamit nga libre sa edipisyo nga gipanag-iya sa MCWD diha duol sa City Hall. Buot ni Rama nga ang karaang edipisyo nga giakupahan kanhi sa Prince Warehouse gamiton sa City Hall nga way abang. Ug ang ikatulong hinungdan, wala makauyon si Rama sa sugyot ni Daluz nga kini magkongresista sa South District ug itugyan ngadto sa lain ang pagkamayor. Gisugyot ni Daluz nga si Kongresista Edu Rama unta ang ilang himoong mayor, apan wala maayon si Mike niini.

Matud ni Daluz nga gipasanginlan siyang nagbuot-buot ug giisip na hinuon nga hulga sa iyang mga plano sa politika. Sanglit giisip naman siyang hulga, nahuna-huna ni Daluz nga tinud-on nalang pinaagi sa pagpakig-atbang sa mayor.

Maisip nga subidahon kining tinguha ni Daluz sanglit dili ti-aw ang pagbuntog sa makinarya sa usa ka incumbent. Apan dili imposible ang maong misyon tungod kay daghan na sab sa mga incumbent ang nangapildi og eleksiyon.

Kun seryoso gyud si Daluz nga mabuntog si Rama, ang una niyang angayang dag-on mao ang suporta sa laing partido nga kabahin sa ilang kwalisyon ---ang Kusug nga gipangulohan ni Bise Mayor Raymond Alvin Garcia--ug ang Bando Osmeña Pundok Kauswagan (BOPK).

Kana kun di mangambisyon si Garcia nga mopapili pagkamayor sunod tuig ug dili mobalik si kanhi mayor Tomas Osmeña o ba kaha si kanhi konsehal Margot Osmeña.