Unta puro maayo mo-homily

Enero 12, 2024. Biyernes, alas 10:00 sa buntag. Ikaduhang adlaw sa misa-nobena alang sa kapistahan sa atong mahal nga Patron sa Sugbo, Senior Santo Niño maoy akong natambongan.

Nagsugwaksugwak na ang mga nanimbahay sa Basilica Minore del Santo Niño Pilgrim Center sa akong pag-abot, diin hangtod sa gawas, nagpunsisok usab ang bagang duot sa mitambong, kinsa ang nanagdalag mga tikyoptikyop lingkoranan, nakalingkod. Samtang ang wala, pabiling nanagbarog!

Iyaha kong gimilagrohan. Didto Niya dad-a akong mga tiil sa usa ka dapit nga bugnaw ang hangin ug wala g'yuy init sanglit gipandongan man ang itaas sa mabagang landong sa kahoy. Unya maayo pa kaayo mowali ang pari.

Gikonektar sa pari ang ebangheliyo bahin sa paralitikong giyayongan og upat ka tawo, sa usa niya ka pobreng parokyano, kinsa kutob kuno sa adunay mamatay nga silingan, kugihan kaayo kining mosag-ob og tubig ug mangahoy para adunay magamit abundang tubig ug kahoy sa mga hilikayon nga pagkaon alang sa mga mitambong-bisita sa  haya.

Ug puwerting kurata sa pari. Kay dihang maoy namatay ang pobreng parokyano, nag-awas-awas usab ang simbahan sa mitambong sa funeral rites ug mihatod hangtod ngadto sa pinaleng kalubngan niini. Gugma ang iyang gitanom sa isig niya ka tawo. Busa, gugma poy iyang anihon.

Pag-abot nako sa balay, gisuginlan nako akong minyong anak nga nindot kaayo mi-homily ang pari sa 10am mass nga akong natambongan.

Haskang dalia niyang misumpay: “Gikan man sab ko didto, Tay. Pero laing time lang akong nasudlan.

Diin, bisag giunsa nakog paminaw ang pari, wa gyod koy nasabtan. Kay gawas nga nagtuyoktuyok, dili haom sa ebanghilyo ang iyang gipaambit.”

Medyo naguol ko. Off and on man gong mosimba kining anaka bisag pirme nakong dasigong mosimba gayod agig pasalamat sa tanang butang: kapait ug katam-is nga among nadawat gikan sa Ginoo.

Unya, dihang mitambong siya sa ikaduhang adlaw sa misa-nobena sa Basilica, nataymingan pa nga…

Ning padayon natong paggakos sa 459th Fiesta Senior misa-nobenas, dungan sa pag-awit sa Bato Balani sa Gugma, ako nangilaba nga unta ang tanang presiding priest, maayo mo-homily.

Kay niini lang panahona nga makaani ang Katolkong Simbahan og daghang nahisalaag nga anihonon. Busa, dili angay usikan ang bulawanong higayon.