Santo Niño gilig-on kabugtoong relasiyon

Normal lang sa pamilya nga usahay magkalalis ang Papa ug Mama tungod sa usa ka butang, nga usahay makahatag kanilag lainlain nga panglantaw samtang nagsud-ong niini.  Pero angay hinumduman nga kini nahitabo, tungod sa ilang dakong gugma ug pagpangga sa ilang mga anak.

Kahinumdoman, sa miaging 2023 Sinulog wala magkahiusa ang desisyon sa atong amahan ug inahan sa Sugbo: nila ni Cebu City Mayor Mike Rama ug Cebu Governor Gwen Garcia, kon asa ang tukmang dapit pagahimoon ang kinatibuk-ang pasundayag sa tinuig Sinulog sa siyudad sa Sugbo nga makanunayong gidumog-gipunsisokan sa libolibo o tingale moabot minilyong dumudoong?

Si Gov. Gwen gusto nga sa naandang Cebu City Sports Center (CCSC) kini pagahimoa. Pero si Mayor Mike, bisag giwarningan na sa nag-uwan-uwan nga panahon, hugtanay gyong mihukom nga bahalag initon o bahaon ang Cebu South Road Properties (CSRP) anhi gyud dinhi ipahigayon ang 2023 Sinulog parade ug Grand Ritual showdown. Resulta?

Daghang contingents sa probinsiya ang wala moapil. Ug mas gipalabi nlang adto mo-join sa Carmen Sinulog 2024, diin didto na lang usab ipasundayag ni Gov. Gwen ang iyang tinuig-halad alang kang Senior Santo Niño – ang iyang Sinulog dance.

Gumikan niini, libolibong concerned citizens, nakapangutana: “Nabugto na ba ang maayong relasiyon sa gobernador ug mayor?

Ang pagpakig-abin ba ni Mayor Mike pag-promote sa mga dagkong negosyante sa CSRP batok sa pagpanalipod ni Gov. Gwen nga dili maalaot ang mga gagmayng negosyante sa kadalanang agian sa Sinulog paingon sa CCSC nga dako kaayo natabang sa income sa siyudad maoy hinungdan?

Maayo na lang, nga ning umaabot Sinulog 2024, medyo nagkasinabot na sila. Diin, ang Sinulog Sa Kabataan showdown anha ipahigayon sa CCSC, diin moapil nag halad og Sinulog dance si Gov. Gwen. Ug mihatag pag minilyong financial assistance sa LGUs nga mosalmot.

Samtang ang grand parade ug Sinulog showdown adto gihapon ipahigayon sa CSRP, nga sa miaging tuig gilangaw!

Dinhi gipabati ni Senior Santo Niño sa katawhan ang presensiya sa Iyang ka-milagroso, diin sa kahibulongang paagi, Iyang gipalig-on ang kabugtoon na untang tam-is relasiyon sa atong Mom and Dad sa Sugbo. Unta, magpadayon na kini. Ug molipang pa, mahal namong Santo Niño.

Viva, Pit Senyor!