BPLO

Nangayo na og lista ang kadagkoan sa Business Permit and Licensing Office (BPLO) sa Cebu City Hall sa mga balay patigayon nga nahimutang daplin sa sapa nga wa gyud moguba sa ilang estraktura nga nahimutang sa 3-meter easement.

Kini maoy basehan nga ang wa gyud moguba sa kabahin sa ilang estraktura nga nahimutang sa 3-meter easement, ilabi na kadtong anaa nagtabon gyud sa sapa, hayan nga dili maisyuhan og bag-o nga business permit para sa tuig 2024.

Si retired major general Melquiades Feleciano maoy gihatagan og tahas sa pagpangguba sa mga estraktura nga anaa sa daplin sa kasapaan, ug labi na gyud kadtong nagtabon sa ibabaw sa sapa, sama diha sa downtown area sa siyudad.

Ang walo ka dagkong sapa dinhi sa siyudad sa Sugbo gidestinohan og mga gitawag og “commander” nga maoy mangulo sa pagpatuman sa Gubat sa Baha, ug gipangayoan na sila og report niadtong mga nagpabuta-bungol lang sa awhag.

Gitutokan pag-ayo sa katawhan ang mga dagkong balay patigayon diha sa downtown area, sama sa Gaisano Main, Colonnade, 138 Mall, Dimsum Restaurant sa Colon, Plastic and Things, ug daghan pa nga anaa daplin sa Estero de Parian.

Gipanid-an nila kon ang kagamhanan sa dakbayan sa Sugbo makapugos ba gyud sa pagpaguba sa ilang estraktura nga anaa gitukod daplin sa sapa. Gidayeg gani ni Mayor Michael Rama ang kadagkoan sa The Freeman kay mipaguba dayon sa ilang kural.

Kon ako la’y pagbut-on, kay dako na man kaayo ang trabahoon kon gub-on gyud paghurot ang building sa Gaisano main nga anaa gitukod ibabaw sa sapa, mahimo ra nga ang sawog sa ilang grocery maoy gub-on.

Ngano man? Gikan sa tubig sa sapa, mga duha na lang ka dangaw, sawog na sa ilang grocery mao nga kon mag-uwan, dili makalusot ang tubig ug molamwas ngadto sa Manalili Street.

Ang mga balay nga anaa gitukod daplin sa sapa, dili usab angay’ng hatagan og special treatment, kinahanglang gub-on sab kadtong milapas na sa three-meter easement.

Gani, kon ang karaang gilapdon sa sapa kaniadto maoy basehan, kay lapad man kaayo ang sapa sa karaang panahon, aw daku kaayo ang maguba sa kabalayan.

Ang Estero de Parian, usa ni sa mga karaang sapa nga anaa makita pa nimo sa mapa kaniadtong tuig

873. Tan-awa didto sa may V. Sotto Street lagbas sa McArthur Boulevard, lapad pa kaayo ang sapa.

Pero didto sa Tinago Bridge dapit na sa dagat, dunay balay nga hinimo sa semento nga anaa gyud nagtabon sab sa sapa, ug wa pa gihapon maguba.