Tigdupa sa mga Duterte
Human nagpaila sa iyang kaugalingon nga Super Ate ng Pangulo (SAP), human nadungog nga ang orihinal nga SAP (Special Assistant to the President) nga si Senador Bong Go maoy usa sa labing buhong nga opisyal sa niaging administrasyon, si Senador Imee Marcos gituohan nga mahimong labing gamhanang tingog sa pamunoan ni Presidente Ferdinand Marcos Jr.
Pero way ebidensiya sa iyang influencia. Mas daghang timaan nga wa siya paminawa sa Malakanyang. Dunay pagduda nga nagkaaway silang First Lady Liza Araneta Marcos. May pasangil sab nga nag-drama ra.
* * *
Si Imee maoy usa sa labing kusganong nisaway sa Maharlika Investment Fund nga giduso sa manghod nga presidente, sa iyang ig-agaw nga si House Speaker Martin Romualdez ug sa iyang pag-umangkon nga si House Deputy Majority Leader Sandro Marcos. Sukwahi sa pangangkon sa Kongreso ug Malakanyang sa kadinalian sa panginahanglan sa Maharlika, niinsistir si Imee nga angayng unahon pagsulbad ang kalisod sa kahimtang sa katawhan ug ang nagbuntaog nga nasudnong utang.
Pero atol sa botasyon sa Senado sa Maharlika sa kadlawong dako niadtong Mayo 31, si Imee wa pakita ug nipalabi sa paghinanok.
* * *
Si Imee kusganon nga nanalipod sa P650 milyones nga confidential funds ni Bise Presidente ug Education Secretary Sara Duterte Carpio (P500 milyones sa Office of the Vice President ug P150 milyones sa Department of Education). Nipasidaan siya nga debatehan pa sa mga senador ang laktod nga pagpapas sa House of Representatives sa pundo ni Carpio.
Pero dihang pormal nang gidasonan sa Senado ang pagpapas sa pundo, way tingog bisan ek na lang si Imee.
* * *
Karong bag-o, giduphan ni Imee ang katungod ni Carpio pagsukwahi sa pagtanyag sa administrasyon og amnestiya sa mga rebelde ug paglab-as sa peace talks uban sa mga rebeldeng komunista. Gisupak niya ang mga awhag sa resignasyon ni Carpio sa gabinete kay makatabang sa administrasyon ang sukwahi nga mga opinyon.
Kon tinuod nga mat-an sa politika ang mga Duterte, maglisod na sila og hangop sa ka-sinsero sa suporta ni Imee. Kay mahimong gi-ulug-ulogan lang sila sa maguwang sa presidente. Ug bisan matinud-anon si Imee nga nilaban nila, morag si Imee na lang ang wa kahibawo nga gibungul-bungolan na siya sa palasyo.
* * *
- Latest
