EDITORYAL - Kamahoan sa paglangoy

Dunay subo nga balita nga nahitabo sa lungsod sa Cordova, duha ka bata nga kaluha nga nag-edad pa og 5-anyos ang nangakalas human silang duha nalumos sa swimming pool sa sud sa usa ka subdivision kagahapon.

Sa ilang edad, lisud tuohang makamao na sila manglangoy. Aksidente ra matud pa ang nahitabo kay nagduwa ra sila og bola unya nalagpot ang bola padung sa swimming ug ilaha kining gisuwayan sa pagkuha apan nalumos na hinuon silang duha.

Wala na sila matabang pa dihang gidala sa tambalanan. Walay gusto sa gidangatan sa duha apan siguradong dunay daghang pamaagi aron unta kadto nalikayan.

Usa niini ang pagbutang og ali o koral sa palibot sa swimming pool aron dili basta masudlan og mga gagmay nga bata, kinahanglang adunay magbalantay niini kay kini peligro para sa mga bata ilabi na kun kini subdivision.

Apan dili lang kini maoy unang higayon nga dunay mga batang nangalumos, gani dili lang bata ang namatay tungod sa samang paagi kondili hasta sab mga hamtong. Dili lang sa swimming pool, kondili diha sab sa dagat, sa mga sapa, ug bisan sa baha.

Ang hinungdan dili sila makamaong molangoy, ang uban nangalumos gihapon bisan makamaong molangoy tungod kay hubog, o gianod sa flashfloods.

Base sa 2021 data gikan Philippine Statistics Authority (PSA), sa 879,429 nga mga natalang namatay nianang tuiga, ang 3,604 niini tungod sa aksidenteng pagkalumos o nalumos.

Ang Pilipinas nalibotan og kadagatan, daghan kini og mga sapa, ug matag karon ug unya dunay mga okasyon nga lunopan sab aha ang mismong ilang lugar nga gipuy-an.

Importante kaayo ang kamahoan sa paglangoy para sa mga batang Pilipino.

Maayo tingaling ipanawagan ngadto sa DepEd nga apilon sa physical education subjects sa mga bata ang swimming lessons ug edukahon sila kabahin sa peligro kun dili sila makamaong molangoy.

Dili kinahanglang magtukod gyud og swimming pool ang tanang eskuylahan apan kinahanglan nga duna gyud untay swimming pool matag schools division.

Kun wala o dili gyud kaya sa budget, makigsabot nalang kining mga eskuylahan og mga pribadong mga resorts nga duna niini diha sa ilang dapit aron didto himuon ang swimming lessons.

Ang kinabuhi importante kaayo, bisan pinaagi nalang niini mapugngan pa ang pagkausik sa kabataan.