Kinsa man gyud ang nidagit sa bata?

Naukay ang mga tawo sa usa ka sitio sa Barangay Mabolo sa dakbayab sa Sugbo niadtong nakalabay’ng mga adlaw human gidala sa usa ka tawo ang kwatro anyos nga batang lalaki diin nakuhaan pa gyud og CCTV footage sa establismento dapit. Makita nga gibaba pa sa lalaki ang bata nga daw mora’g suod ra sila kay anad man ang bata kong basehan sa CCTV.

Alas 10 sa buntag nahitabo ang pagkuha sa tawo sa bata ug dunay nag ingon nga gisakay sa usa ka bus apan nakit-an ra usab kini sa gawas sa usa ka dakong tindahan sa downtown area sa dakbayan sa Sugbo hangtud nga nadala og balik ngadto sa iyang apohan.

Giadto nako sa ilang dapit ang bata ug ang iyang apohan, hilabihan gyud ka anad bataa nga moduol ug mohangop dayon sa mga tawo nga mao pa gani niya pagkakita sama nako ug sa akong camerman, nakaingon ko nga makawat gyud kining bataa kay anad man kaayo bisan sa mga estranyo.

Matud sa iyang lola nga namatay na ang amahan sa bata ug ang inahan niini nibiya kaniya dihang duha pa lang kini ka buwan ug ang iyang apohan na ang nagbuhi pinaagi usab sa tabang sa ilang mga silingan. Naa may anak ang tiguwang nga mao usay nagbuhi kanila gikan sa kita niini isip parking attendant.

Luoy kaayo ang kahimtang sa mag lola kay ang ilang gipuy-an mas dako pa gani ang kasilyas nga igo ra gyud silang duha kong mangatulog. Ang bata murag uhaw sa pagmahal sa usa ka amahan nga makakita og murag father figure mosalig og mosugot kong dad-on.

Sumala sa apohan nga wala gyud sila makaila sa lalaki nga nagdala sa bata base sa kuha sa CCTV apil na ang ilang mga silingan wala usab makamay-ong sa lalaki. Ako mismo nagtuo nga adunay intention nga dautan ang maong lalaki sa bata apan tungod kay nag viral sa social media ug nasibya usab sa mainstream media iya nalang kining gibuhian.

Dili seguro kidnap for ransom kay wala may kwarta ang pamilya sa bata apan posibleng adunay laing katuyoan ang naasoy’ng lalaki nga siya ra ang nasayod busa gikinahanglan nga matumbok ug madakpan kini sa kapolisan aron mahatagan og katin-awan ang tanan.

Bisan og maayo ang iyang tinguha kintahay iya lang gisuroy ang bata, manubag gihapon kini kay wala man siya mananghid sa pamilya sa bata nga nabalaka intawon kaayo sa pagkawagtang niini. Dili lalim ang kaguol ug kabalaka sa lola kong asa na ang iyang apo.

Moingon ra ba ang ubang mga tawo ilabi na kadtong wala masayod sa kahimtang sa pamilya sa bata nga nagdanghag lang ang gabantay maong nadagit ang bata. Seguro dunay kamatooran apan sabton pud nato ang kahimtang sa iyang lola nga tiguwang ug masakiton pa.

Sa nahitabo sa bata nga daling nakit-an makaingon ko nga duna usab diay kaayohan ang social media o bisan ang mainstream media kay kong wala pa to nikatap ang panghitabo duda ko nga makit-an pa kadtong bataa.

Huwaton nalang nato ang resulta sa imbistigasyon sa kapolisan kay mao kini ang ilang gitutokan.