EJK resulta sa hinay nga hustisya matud ni VP Sara

Nahimong pinasidunggang dinapit si Besi Presidente Sara Duterte sa panagtigom sa mga trial judges sa tibuok nasud diin gipahigayon sa usa ka hotel sa dakbayan sa Sugbo.

Giila niya ang natampo sa mga huwes sa pagpatigbabaw sa rule of law ug ang kawalay kakapoy ug kukahadlok sa pagpatuman sa hustisya.

Apan sa samang higayon gilatag sa bise presidente ang problema sa justice system sa nasud nga nisangpot usab sa laing mga problema diin usa niini ang extra-judicial killings kon EJK ug nganong nahitabo man kini.

Ang isyu sa EJK ang nahimong tatak kaniadto panahon ni kanhi Presidente Rodrigo Duterte nga hangtud gani karon isyu gihapon sa International Criminal Court kon ICC. Hinuon wala pa man kapamatud-i kon adunay kalambigitan ang kanhi administrasyon sa maong matang sa pagpamatay sa mga tawo.

Matud ni VP Sara nga problema gihapon karon ang kahinay nga lihok sa hustisya nga maoy nakapawagtang sa pagsalig sa mga tawo nga giuhaw sa hustisya, tungod sa ka despirado mamahimong kumkumon nalang ang balaod sa ilang mga kamot ug maoy mopatuman sa gustong hustisya nga matagamtaman.

Sakit nga realidad ang gipabuhagay sa bise presidente, hangtud karon ingon ana gihapon ang nahitabo, hilabihan ka dugay ang paglihok sa ligid sa hustisya ilabi na kadtong mga walay kwarta.

Ang mga biktima maglisod sa pagpadakop sa mga suspek, kong madakpan man mabuhian gikan sa bilanggoan kay maayong laki ang mga abogado, samtang ang mga biktima dili gani maka afford og kuha og abogado.

Sa ingon niini nga sitwasyon, makahuna huna gyud ang uban nga mihimo og pamaagi aron maangkon nila ang hustisya nga idlas kon ipaagi sa due process kay lagi para lang kini niadtong adunay kwarta ug impluwensya.

 Alang sa uban ang balaod ug ang hustisya alang ra sa mga adunahan.

Busa gihagit sa bise presidente ang mga huwes nga magtinabangay alang sa kausaban sa systema aron mamahimong patas sa tanan.

Ang mga huwes ligdong walay kwestyon sa ilang intigridad ug kridibilidad ilang gipatuman kon unsa ang anaa sa balaod o rule of law, unta ma-apply kini sa tanan walay pili ma pobre man o ma adunahan patas ang tanan aron wala nay makahuna huna pa sa pagkumkom sa balaod sa ilang mga kamot.