Maligno sa resort
MAG-INGAT sa mga pinupuntahang resort, pasyalan o pahingahan. Lalo na ‘yung mga nasa liblib na lugar at malayo sa kabihasnan.
Baka may mga “malignong” naglalabasan diyan lalo pagsapit ng gabi kung saan nawawala ang inyong mga kagamitan tulad ng mga nakaparadang sasakyan.
Sa Baras, Rizal, may isang resort na notoryus pagdating sa mga paglabag. Tila naging palaruan ang kanilang resort ng mga magnanakaw ng motorsiklo.
Ang mga CCTV sa resort, naging palamuti lang dahil ayon sa management ng resort, sira raw. Ni walang security guard para bantayan ang pasilidad maging ang mga nakaparadang sasakyan sa kanilang nasasakupan.
Ang pinakamasaklap, makailang beses na raw ipinasara ng munisipyo ang nasabing resort. Subalit, patuloy na nagbubukas at tumatanggap ng mga customer na tumatangkilik ng kanilang pasilidad.
Ang Lihim na Batis, isang resort sa bulubundukin ng Baras, Rizal ay inireklamo sa BITAG dahil sa pagkawala ng motorsiklo ng isa nitong mga customers. Hindi matawagan, walang pamunuan na pwedeng makausap, walang sekyu at sira ang mga CCTV.
Saan kaya kumukuha ng lakas-loob ang negosyong ito na patuloy na labagin ang kautusan ng otoridad at balewalain ang mga reklamo laban sa kanilang pasilidad?
Kung hindi ang munisipyo at pulis sa bayan ng Baras, Rizal – kanino may pananagutan ang negosyong ito?
Ang panghihimasok ng BITAG at pag-aksiyon sa nawawalang motorsiklo ng mga nagrereklamo, abangan sa BITAG Official YouTube page.
Buong munisipyo, nabulabog. Ang mga tutulug-tulog, nagising.
- Latest
