EDITORYAL - Seryosong hulga ang hackers

Gipasayon sa teknolohiya pinaagi sa internet kining mga transaksyon ug proseso sa katawhan gikan sa mga pribado nilang kalihokan ug bisan mga transaksyon sa nagkadaiyang ahensiya sa gobiyerno.

Apan unsaon man kun ang mga unta para sa mga mata lang sa gobiyerno nga mga impormasyon sa katawhan dili maproteksyonan batok sa mga kriminal nga grupo o bisan walay lingaw nga mga pundok nga gusto lang motisok og kabalaka sa katawhan?

Kini sama sa nahitabo karon sa Philippine Health Insurance Corp. (PhilHealth) nga na-hack sa grupong Medusa ilang data base ug giingong 600GB nga data nila ang nakawat.

Ang Medusa sa miaging semana nangayo og ransom ngadto sa gobiyerno nga mokantidad og $300 mil, o P16 milyones kung dili niini gustong ipakatap dark web o ibaligya ang data ngadto sa mga kriminal nga grupo sama sa mga scammers, online scams ug daghan pang uban nga ang tumong kawaton ang mga kwarta sa mga biktima sa mga bangko ug uban pa.

Nagmagahi ang gobiyerno sa pagsanong ug mipasalig ang PhilHealth nga buhaton ang tanan aron maprotektahan ang mga miyembro niini. Apan kagahapon, gikatahong gitinuod sa Medusa ang ilang hulga.

Matud pa sa report sa Philstar.com, dunay mga dark web informants nga mibutyag nga dunay mga dokumentong gikawat gikan sa PhilHealth ang gipublikar sa online marketplace sama sa Telegrams sugod kagahapong adlawa.

Ang nakawat nga data gikan sa PhilHealth naglangkob sa mga pangalan, mga personal nga impormasyon, mga paryente, medical records ug uban pa sa miyembro.

Busa karon palang, kinahanglang magmatngon ug dili magkumpiyansa ang mga miyembro sa PhilHealth kun pananglitan makadawat kini og mga text, messages ug uban pang matang sa komunikasyon nga dili nila sagad madawat , kay posibleng gikan kini sa mga scammers.

Kaning nahitabo sa PhilHealth kapunitan unta og pagtulon-an sa tanan, ilabi na sa mga ahensiyang nangolekta sa mga personal nga impormasyon sa ilang mga miyembro o kliyente sanglit tinuod ug dili hinimo-himo kining cybercrime.

Tungod kay kasaypanan ug pagpabaya man kini sa habig sa PhilHealth, kinahanglang manubag sila niini. Sa samang higayon, kinahanglang maghigpit na ang ubang mga ahensiya sa gobiyerno bahin sa ilang data privacy security.