Ikakawhaag-Pito nga adlaw

Mga Anghel nga Masupilon: Ang mga Demonyo ug Ang Yawa

Sukaranang Teksto

Basaha: Job 1;1-12

Pasiuna

1. Tinuod ang yawa ug dili lang siya simbolo

2. Naglihok siya sa kalibotan kaniadto hangtud karon.

3. Kinahanglang suklan siya ug sirad-an ang bisan unsang ganghaan nga mahimong siya makasulod sa atong kinabuhi.

Pagpalawom

Addendum  

Unsay kalainan sa demonyo ug yawa? Ang demonyo gikan sa Griyegong Pulong Daimon nga nagpasabot og dautang Espiritu. Samtang ang yawa mao man ang ni personahe sa masupilong anghel nga si Lucifer nga nailhan usab nga Satanas. Ang pulong Satanas nagpasabot man og ang nagpatibulaag.

1.  Tinuod ang yawa ug dili siya simbolo lamang ang mga kasinatian sa mga Santos sama ni San Juan Maria Vianney, San Juan Bosco ingon man ang mga ebanghelyo sa Balaang kasulatan ug ang mga panghitabo sa daang tugon sama nila ni Job, ni Tobias ug uban pa, pagmatuod lamang nga anaa gyud ang yawa ug ang mga demonyo, aktibo ug naglihok hangtud karon.

2.  Kalipay sa yawa nga ang mga tawo dili motuo nga anaa siya nagtikaw tikaw. Buot niyang molihok diha sa anino. Mas epektibo kun molihok siya diha sa tago. Kay diha sa pagtago mahimo niyang malingla ang mga tawo ngadto sa iyang lit-ag. Bisan sa pagsugod pa lang daan sa kabuhatan (Genesis) hangtud na sa kapanahohan sa atong Ginoo. Mao man kini ang kamandoan sa atong Ginoong Jesus. (cf. Mt. 10;7-8)

3.  Ang sala maoy unang ganghaan kun nganong makasulod ang yawa sa atong kinabuhi busa ato kining tak-opan pinaagi sa sakramento sa pagkumpisal ingon man ang paglikay sa mga balansayon sama sa mga patuo tuo, ug uban pang mga balansayon nga iya sa kangitngit.

Pangamuyo

ANIMA CHRISTI

Kalag ni Cristo, Santosa Ako

Lawas ni Cristo Luwasa

Dugo ni Cristo, buyoha ako

Tubig gikan sa kilid ni Cristo hugasi ako

Kasakitan ni Cristo, lig-ona ako

O maayo nga Jesus pamatia ako.

Sulod sa imong samad, tagoa ako

Ayaw itugot nga mahimulag ako kanimo.

Gikan sa kaaway nga dautan panalipdi ako

Sa takna sa akong kamatayon, tawga ako

Ug sa pagbut-an mo, makadangat ako kanimo

Aron uban sa imong mga santos, daygon ko ikaw hangtud sa kahangturan. Amen!

Kalihokan karong adlawa

Bag-oha ang imong panaad sa bunyag. Isalikway si Satanas ug ang tanan niyang mga haylo ug lingla. Ampoa ang Credo sa mga Apostoles.