Si kinsa man ako?

MAAYONG BALITA

Ang atong Ginoo sa ebanghelyo karong Dominggoha nangutana una public opinion. Kinsa man ako atubangan sa uban. Sila nitubag: Ang uban niingon nga ikaw si Elias, Jeremias o uban pang mga propeta. Kini segun sa ilang nasayran ug nasaksihan kuyog sa kadaghanan. Apan si Pedro nihatag man sa iyang personal profession of faith sa iyang pag-ingon: “Ikaw ang Mesiyas, ang Anak sa Dios nga Buhi.” Kini pinasikad sa personal nga kasinatian niya kuyog sa iyang Diosnong Magtutudlo nga giisip niyang Ginoong Dios.

KASINATIAN

Dali ra kaayo ang paghisgot ug pagsulti mahitungod sa Ginoon Jesus. Bisan kinsa makahimo man niini. Apan sa laing bahin ang pangutana mao: “Nakahimo ba kita sa pakigsulti sa Ginoo ug pakigsuod kaniya?” kay basin kutob ra kita sa paghisgot mahitungod sa Ginoo apan wala kita maningkamot nga mogahin og igong panahon aron siya atong maila ila ug masuod?

LIHOK

Ang pag-ampo maoy kahimanan aron mamahimo kitang mas duol ug makasinati sa presensiya sa Dios. Pinaagi lamang niini kita mamahimong mas mahigugma sa Ginoo kun siya atong mailhan ug masinati diha sa pag-ampo, balaang kasulatan ug sa mga sakramento sa Simbahan.

PANGAMUYO

Ginoo ko ug Dios ko! Unta mamahimong mas masinati ko ikaw sa among kinabuhi…. Ang kinabuhi nga imo untang giyahan. Ang imong kinabuhi mamahimo untang among kinabuhi. Ang imong pagtulon-an maoy among giya. Ikaw nga buhi ug hari hangtud sa kahangturan. Amen.

BALITAHOM

Atty. JOSE MARIE N. POBLETE

Namaligya'g balanghoy

si "Maam"

Gitin-aw ni DepEd-7 Director Salustiano Jimenez nga dili compulsory ang pagsul-ob og uniporme ingon man ang pagpangolekta’g amutan sa mga estudyante sa publiko’ng tulonghaan aron malikayan ang dugang galastohan sa mga ginikanan. Apan aduna gihapo’y mga ginikanan nga mopasul-ob og uniporme sa ilang mga anak.  Dili na lang nato kini tukion ni sawayon kon unsa ang ilang rason.  Alang sa akong amigo, mas angay tutokan sa DepEd ang lagda nga nagdili pagpanghatag sa mga daan nga uniporme sa mga maestra. Salikwaot tan-awon si Lola nga naglukdo ug naninda’g lagutmon unya nagsul-ob og uniporme sa maestra.  Fezteleern!

DILI BAYANI

Giawhag sa mga magbabalaod nga sakop sa Makabayan bloc si kanhi Presidente Duterte nga ipanghimakak ug isalindot niini ang giingon’g saad ngadto sa China sa pagguyod sa BRP Sierra Madre palayo sa Ayungin Shoal. Dili kaayo nako matugkad ang katuyoan ni’ng maong pag-awhag. Dili tataw kon unsay kaayohan kon moangkon kita nga adunay saad (bisan wala).  Dili usab makadaut kanato kon dili nato tagdon kini pasangil sa China, hinunoa, makapalig-on kini sa atong baruganan.  Asa man diay ni sila pusta?  Ginaingon baya nga, “Ang tawo nga makig-away sa iyang kaugalingon’g nasud dili gayod matawag nga bayani.”  Muleeng!

LANGIT RA’Y NASAYOD

Nagkadaghan na ang mga kagamhanan’g lokal ang mipasaka og resolusyon nga nag-deklarar kang drag artist Pura Luka Vega nga “pesona non grata” tungod sa iyang drag performance nga giingon’g nagbugal-bugal ug nagpanamastamas sa Katoliko’ng pagtuo.  Wala matandog si Vega sa deklarasyon kay alang kaniya adunay panagbuwag sa estado ug sa simbahan.  Walay tataw nga lagda sa tawo nga gisupak si Vega ug wala pu’y lagda nga magpugong sa kagamhanan pagpalabang sa maong resolusyon.  Sa pangutana kon aduna ba’y nasayop, haum ang pagya nga nagkanayon, “Langit ra’y nasayod.”  Saoonz!

^{CLIMATE CHANGE UG DENGUE}

Namahayag ang director sa DOH-Epidemiology Bureau nga si Dr. Althea de Guzman nga tungod sa climate change, nga nakapausab sa temperature ug sa dagan sa panahon, mosaka usab ang risgo sa mosquito-borne diseases sama sa dengue ug Zika.  Gipahinumduman ang publiko sa kanunay nga pagpanglimpyo sa ilang palibot. Naguba na gayod ang atong kalikopan nga hinungdan usab sa pagka-diskarel sa balanse sa ecosystem.  Ang wala maguba mao na lang ang sistema sa kurapsyon ug pagpangawkaw sa kagamhanan nga hinungdan usab sa kapakyas sa mga programa nga motubag unta sa climate change.  May’pag moligeed!

WALA’Y NANGAMAHAN

Gidiskutir na pagbalik sa konseho sa dakbayan sa Sugbo ang bag-ong bersyon sa Revised Real Property Tax Code human gi-veto ni Mayor Michael Rama ang orihinal nga bersyon sa maong balaodnon. 

Apan adunay pangutana nga mitumaw sa konseho kon ngano nga walay konsehal nga nangamahan sa maong Revised RPT Code.  Sa kataas sa usbaw sa bulohisan, nga mahimong dili ikahimuot sa mga magbubuhis, daw walay konsehal nga ganahan mo-sponsor sa maong balaodnon. 

Ni’ng kahimtanga, mapanag-ing nato ang Revised RPT Code sa usa ka tawo’ng sanglahon nga walay ganahan mopaduol ni mahilambigit.  Madahaan!