Pagwagtang sa mga visual aid sulod sa classroom makaayo ba?

Nakaani og nagkadaiyang reaksyon ang gipagawas nga memorandum sa Department of Education, ang “no decoration policy” sa mga classrooms apil na ang mga visual aids nga naandan na sa mga tinun-an kay lagi makahatag kuno kini og destruction sa focus sa mga estudyante. Misaka ang kilay sa mga magtutudlo ug mga ginikanan ug labaw na seguro ang mga tinun-an kay mao naman kini ang naandan.

Ang mga magtutudlo gani mogasto sa kaugalingong kwarta aron mamahimong matahom ang ilang classroom kay maghatag usab kini og kadasig sa mga tinun-an ilabi na kadtong mga bata pa nga maka-appreciate gyud sa mga colorful nga educational materials nga anaa sa ilang palibot.

Mas mapadali ang pagpasabot sa mga bata pinaagi sa nga visual aid, gawas nga malingaw sila makakat-on og dali. Base usab kini sa kasinatian sa mga tinun-an ug sa ilang mga magtutudlo kay sila man ang nag obserbar sa performance sa ilang mga estudyante.

Sa sinugdanan dili nako matugkad ang ang rason sa DepEd nganong gihipatuman nila kini kay kong tan-awon makaayo ug makatabang kini sa learning process sa mga estudyante kay dili boring ang pagkat-on sa mga leksyon sulod sa mga classrooms.

Apan gipasabot ko ni Dr. Salustiano Jimenez, ang Director sa DepEd Region 7, nga mas maayo nga minimalist ang systema sa mga classrooms walay daghang mga abobot o dayan dayan nga mura na og fiesta o carnaval ang classroom tungod kay nanghinubra na sa ka colorful nga posibleng makaguba na sa concentration sa mga batang tinun-an.

Tinuod pud bitaw kay usahay nanubra na pud ang uban nga halos tibuok classroom dunay mga nakapilit nga mga bisan unsa, bisan og educational materials apan ang reality makababag tuod sa concentration sa mga bata kay inay maminaw sa magtutudlo magsige naman og liraw-liraw ang mata ngadto sa visual aid ug mag imagine na seguro sa drawing didto.

Aduna nay daghang na-feature sa TV ug bisan sa social media nga gihimo nang mora’g hotel ang classroom sa tinguha nga malingaw gyud ang mga tinun-an apan nagbunga ba gyud kini og kaayohan sa mga tinun-an?

Karon kay bag-o pa man ang memorandum gilauman gyud nga adunay daghang magbagutbot. Apan hatagan seguro nato og kahigayonan nga masuwayan kong walay distraction sa mga bata nga basin og molambo ang pagtuon kay makatutok naman lang gyud sa leksiyon.