Lumiliit na ang mundo ni Teves
Nauna nang idineklarang terorista si Arnulfo Teves ng Anti-Terrorism Council, prime suspect sa paglikida kay Negros Oriental Governor Roel Degamo, at noong Miyerkules, tuluyan na siyang pinatalsik sa pagiging representante ng naturang lalawigan sa botong 265 ng kanyang mga kasamahang kongresista. Paliit nang paliit ang kanyang mundo kahit saan siya magtago.
“Disorderly behavior” ang naging dahilan ng kanyang pagkakapatalsik at walang direktang kinalaman ang mga serye ng pagpatay sa kanyang lalawigan na ipinaparatang din sa kanya. Bakit disorderly behavior? Ito’y dahil sa nag-viral na video ni Teves na nagsasayaw na naka-boxer short lang.
Para niyang inalipusta ang sarili niyang katungkulan bilang Kongresista ng pinagpipitagang Kamara de Representante. Kasama rin sa sinasabing paglabag niya ay ang kanyang pagpapabaya sa tungkulin bilang mambabatas sa patuloy niyang pagtangging bumalik ng Pilipinas at paghingi pa ng political asylum sa Timor-Leste.
Ang mga iyan umano ay paglabag sa sinumpaan niyang oath of office nang manungkulan siyang mambabatas. Walang direktang kinalaman sa mga kaso ng pagpatay at tangkang pagpatay na ibinibintang sa kanya. Sa kanyang napakatagal na absence sa Kamara, nawalan ng kinatawan ang distrito ng kanyang probinsya kaya ito’y pagpapabaya sa tungkulin, ano man ang dahilan niya. Pero kumusta naman ang mga kasong ipinapatong kay Teves?
Kung may mga kaso nang nasampa, pugante na siya ng batas na maituturing at maaari nang humingi ng tulong ang Pilipinas sa Intenational Police o Interpol para siya matunton, arestuhin at ibalik sa Pilipinas. Kailan mangyayari ito? Noong hindi pa pinipigil ang kanyang mga kayamanan, maaari siyang manuhol kaya mahirap madakip. Pero ngayong frozen na ang mga assets niya, wala na siyang power para gawin iyan.
Nasa ibang bansa pa si Teves dahil ayaw umuwi at natatakot sa mga kasong ipinaparatang sa kanya. Sa pagkakadeklara sa kanya bilang terorista, frozen na rin ang kanyang kayamanan kaya hindi na niya puwedeng gamitin kung balak man niyang manuhol o bumili ng proteksiyon. Sa ibang salita, wala na siyang kapangyarihan, maliban na lang kung mayroon siyang kaalyadong maraming pera na gagastos para sa kanyang press releases, abogado at iba pa. Kailan kaya papasok ang Interpol sa eksena?
- Latest