Pangitai og sulbad

Nahinumdom ko nga dihang nangampanya si Atty. Winston Garcia pagka gobernador sa Sugbo kaniadto, iyang plano nga dunay pagamugnaon nga coastal road gikan sa Carcar paingon dinhi sa Talisay.

Gipakita niya ngadto sa media ang hulagway sa mapa sa kabaybayonan sa Carcar paingon sa Talisay, ug kon asa mag-agi ang giingon niyang coastal road nga gitumong aron pagsulbad sa grabeng problema sa traffic.

Kay igsuon man si Winston ug si Cebu Governor Gwen Garcia, mas maayo tingali nga sagopon ni Gwen ang plano sa iyang igsuon, kay maayo man ni.

Ayaw ko’g ingna nga si Gwen wa makasinati og traffic sa matag agi niya sa Minglanilla, Naga, San Fernando paingon na sa Carcar? Ingon usab niini ang angay’ng himoon diha sa mga dapit sa Liloan, Compostela, Danao ngadto na sa Carmen.

Sa Mandaue paingon sa Liloan, duna na may alternate road nga anaa mag-agi sa Barangay Tayud, ug adto molusot sa lungsod sa Liloan, apan wa pa lagi makompleto ang pagpalapad sa karsada mao nga wa pa kaayo’y nangagi.

Kini maoy dakong hagit sa kadagkoan sa Department of Public Works and Highways (DPWH) nga makamugna sila og laing karsada nga kaagian sa nagkadaghang sakyanan.

Kadtong gihimo sa DPWH nga naghimo sila og national highway gikan sa Barili ug iagi nila sa Aloguinsan, Pinamungajan, Toledo, nindot na kay aron kadtong taga south, dili na moagi diri sa Carcar ug maibanan ang problema sa traffic.

Apan mao lagi, nagpadayon pa ang paghimo sa lapad nga karsada nga anaa pa karon sa Barangay Palatdan, Barili ug dugay pa kaayo kini nga mahuman.

Sigurado ko nga adto nila ni idugtong sa mga gagmay’ng karsada sa Aloguinsan ug Pinamungajan, apan dugay lang gihapon kay palapdan pa man ang karsada.

Way balaod nga nagpugong sa mga tawo pag-angkon og sakyanan, ug kay daghan na man ang miasenso sa ilang kahimtang, namalit na og mga sakyanan.

Tiaw mo nga pagkakaron, sa usa ka tuig lang, moabot na ngadto sa dul-an sa 60,000 ka bag-ong sakyanan ang madugang sa mga sakyanan nga narehistro sa Land Transportation Office.

Dinhi lang sa Central Visayas, mga usa ka milyon na ka sakyanan ang narehistro, ug sagad niini ania magdagan sa Sugbo mao nga puno-puno gyud ang atong mga karsada.

Pun-an pa sa daghang driver nga kuwang og kasinatian sa tukmang pagmaneho og sakyanan, sama nianang magpadagan nga hinay pero anaa magpatunga ug makabalda sa pagdagan sa ubang sakyanan.

Ang ubang driver way kaikog ug anha moparking sa dapit nga makabalda sa pag-agi sa ubang sakyanan ug makamugna og traffic.