Kahugaw sa PNP gipahungaw

Sagad sa mga kongreisista ug senador nga miimbestigar niining nangabistong opisyal sa kapolisan sa atong nasud, kinsa nahilambigit sa mga dinagkong kontrobersiya sa illegal drugs ug sa uban pang matang sa krimen, mokunot gyod ang agtang ug mangahayblad.

Kay ang gibato nilang pangutana ngadto sa giimbesitgahang nakauniporme, diin ang tubag: ‘Oo’ ra, o ‘Dili’, ingon sa maglisod sa pagtubag. Ang giimbestigar moungot kadiyot ug mosimang-mataas ang tinubagan nga klaro kaayong nanalipod daan sa iyang kaugalingon.

Bitaw. Ultimo si Hesus, mipahimangno sa iyang mga tinun-an unsaon pagtubag ang pangutana sa miimbestigar. Dili na kinahanglan tas-on. Kondili, matod Niya: “Ingna hinuon: ‘Oo’ kon ang inyong gipasabot ‘Oo’; ug ‘Dili’ kon ang inyong gipasabot ‘Dili’. Ang inyong isulti gawas ini, gikan na sa yawa.” (Mateo 5:37)

Mao nga ning 990 kilos shabu controversy nga giimbestigahan sa atong mga magbabalaod, may mga police officials nang na-cited in contempt ug nangapriso tungod sa ilang kabakakon.

Matud pa ni Kongresista Bonifacio L. Bosita, kanhi PNP official, naanalisar niya nga ang sinugdanan ning pagkahimong dautan sa atong kapolisan diha sa ilang panerbisyo mao ang quota-quota order: ‘Pagpanakop og illegal drugs pushers/personalities’ nga nagagikan kuno sa kinatas-ang opisyal. Diin kanhi sa iyang pagka opisyal, nasinati sab niya.  Kada Lunes pirme siyang paninglon sa iyang labaw kon may nadakpan bang pushers iyang mga sakop?

Lahi ang paaging iyang giaplay. Tanang 20 ka ngalang anaa sa Drugs Watch List, iyang gipadad-ag sulat ang pamilya aron pasurenderon. Kay kon mosurender tangtangon sila sa listahan, ipaseminar og pastor or religious leaders. Kini base sa nindot kunong pamaagi sa kanhi si Senador Bato dela Rosa pay PNP chief.

Napasurender niya ang 20 ka nalambigit sa illegal drugs. Pero nakurat na lang siya, kay paglabay sa pipila ka adlaw gitaktak siya sa puwesto ug giparelibohan. Siya nga nagtinarong sa serbisyo mao pa ang gigirawot.

Busa, kon mao man kini ang gihimong pamaagi sa mga PNP chief successors ni Senador Bato, unsa pa man ang kaayohan nga atong mapaabot gikan sa tanang kapolisan nga mialagad sa tibuok natong nasod karon? Tua ra bay atong commander-in-chief, imbes tutokan, seroyosohon pagsulbad ning problemaha, nagpunay hinuog suroysuroy.

Unta, mahigmata na siya.