DOJ secretary gipayla’g kaso

Alang sa mga magbubugha og kahoy, dili angay mokompiyansa nga ang wasay ninyong gigamit  hait. Kay adunay higayon nga ang kahoyng inyong giatsa may pagkabahion.

Diin imbes mapikas, igo lang mountol ug mosumbalik pag-igo sa inyong nawong.

Ug mao kini ang nahitabo ni Justice Secretary Crispin ‘Boying’ Remulla, kinsa tungod sa iyang paghupot og dakong gahom sa Department of Justice, nagtuo nga sayon ra niyang buhatbuhatag salaod si suspendidong Bucor Chief General Gerald Bantag ug pinaagi sa pag-unaunag hukom nga kini maoy mastermind sa Percy Lapid’s murder case, dali ra niyang mapakonbikto.

Tanang impluwensiya, butang ug tawong anaa sa mga kamot ni Boying gipanggamit aron lamang hugawhugawan ang malinis imahe ni Gen. Bantag ug madugta sulod sa bilanggoan.

Apan dili lang puthawng kahoy si Gen. Bantag. Genuine gold usab nga bisag digoon sa lapok ang kinatibuk-an, mosidlak gihapon ang tiunayng bulok kon hitandangan sa kahayag.

Sa social media, daghang nag-ampo nga unta tabangan si Gen. Bantag sa Ginoo nga makalingkawas niining mga lapokong pasangil nga sa ilang paniid, pulos tumotumo lamang.

Ug sa miaging Pebrero 14, gidungog ilang pag-ampo. Gihatagag talagsaong Valentines gift sa Kahitas-an si Gen. Bantag. Tungod kay ning maong adlaw, nadawat niya ang tubag-kopya sa Office of the Ombudsman nagpahibalo: Nga ang gipayil niyang reklamo uban sa iyang mga abogado batok kang Boying niadtong unang semana sa Enero 2023 giaksiyonan na.

Ug gimandoan na si Boying pagtubag ning mga kasong mosunod: Murder. Diin si Boying ang gitudlong mastermind sa pagpatay ni Percy. Grave misconduct. Conduct prejudicial to the best interest of the service. Ug conduct unbecoming of a public official.

Kining tanang sumbong suportado og mga lehitimong ebidensiya nga gibase ra usab sa unsay ilang nahipos gikan sa kampo ni Boying, kinsa sa pagpunayg mind-condition sa publiko aron ipatuo nga si Gen. Bantag maoy mastermind, nasakpan-klaro sa Team Bantag lawyers nga full of inconsistencies ang gipanghimo sa Team Boying.

Gani, ultimong middle name sa tawo nga masayop, maka-invalid man sa kasong gisang-at. Unsa na kaha sa mag-usab-usab nga statement ni Boying ug sa iyang gipanghimong pinirisong witnesses? Aw, si Boying nay bahala motubag niini sa Ombudsman.

Justice Secretary, good luck!