Gitikasang maestra silotan?

Sa eskuylahan, ang titser maoy ikaduhang ginikanan sa nagtunghang mga anak. Responsibilidad sa mga magtutudlo ang paggiya sa kabataan unsay maayo, unsay bating buhat? Busa, hisabtan nako kadtong gibuhat sa nag-viral nga maestra sa social media, kinsa mianig mas daghang pagsaway kay sa midapig.

Maila sa sinultian niini nga gusto gyod niyang tun-an iyang mga estudyante og ‘Honesty’ ug kontra niya kaayo ang manikas-magkinopyahay panahon sa eksam. Gani, iyang giklaro nga bahalag gamay rag kuha sa test iyang estudyante basta honest lang, mosabot ra gihapon siya. At least, adunay kinaugalingong nakat-onan.

Nindot ang tumong sa maestra. Ugaling lang, tungod sa iyang nag-aso-asong emosyon pagkorehir sa unsay sayop, nakalimot nga milapas na diay siya sa linya. Kay imbes ang mga hingtungdan tinun-an ra untay iyang maymayan sulod sa counselling room, gibandilyo-Tiktok man hinuon niya gamit ang iyang selpon.

Gipaimbestigahan na sa Department of Education (DepEd) ang maong maestra. Ug kay nalapas man niya ang DepEd Professionalism Policies nga bag-ong giisyu ni Vice President and Education Secretary Sara Z. Duterte-Carpio, delikadog masilotan siyag bug-at.

Pagkasubo palandungon. Siya nga gitikasan sa mga estudyante, mao pa hinuoy silotan? Dili kaha sila molausag ug magtuo nga husto ilang gibuhat?

Mga estudyante bayay sinugdanan sa salaod nga maoy nakapasunog sa maestra? Ang mga estudyante maoy nagmugnag kalayo nga misunog sa maestra. Unya, ang maestrang nasunog mao hinuoy gihimong maot ug gihan-okan sa daghang pagsaway? Kanus-a ba nahimong matahom ang hitusra sa butang o tawo nga nasunog?

Kon wala lang magpabadlong ang mga estudyante, unsa man ang ika-post sa maong maestra sa social media? Biktima lamang siya sa sunog. Samtang ang mga estudyante mao ang kalayo.

Di gyod masunog si teacher kon wala pa si fire. Ug unsaon man pagkapalong sa fire kon si teacher ray gipasiritag water?

Unta dili lang ang maestra maoy silotan sa DepEd. Dapat, mga nakasalang estudyante, hatagan sab og disciplinary action nga makapaamgo sa nahimo nilang salaod. Buwahan, dili sila mahidugang sa badlongong minors, kinsa nahimong mga daotan tungod sa pagka-overprotective sa atong Child’s Abuse Law.

Unta, patas ang DepEd sa paghukom. Kay kon ang mga batang estudyante may human rights, ang mga magtutudlo aduna usab.