Nakalingkawas sa trahedya

Siyam ka balay ang gilamoy sa landslide ug naa pay laing duha ang nagbarug pa apan delikado nga malahosan sa pagkatumpag sa sitio Grahe, Barangay Busay dakbayan sa Sugbo niadtong Sabado sa hapon.

Maayo nalang kay walay kinabuhi nga nadisgrasya sa pagdahili sa yuta human nakahikling na daan ang mga nagpuyo sa dapit, bahala na og nalamoy ang mga balay basta luwas lang ang mga nagpuyo.

Nakuhaan og video ang actual nga landslide nga gilamoy gyud sa yuta ang mga balay. Makapakitbi sa atay ang talan-awon, na anghelan pa gyud ang mga residente gikan sa tinong kamatayon.

Makita nato dinhi nga malikayan gyud ang disgrasya kong kahibalo ang mismo mga molupyo sa pagseguro sa ilang kinabuhi sanglit sila man ang labing nasayod kong luwas o dili na ba poy-an ang dapit.

Sagad sa mga nahitabong landslide sa ubang dapit dunay nadisgrasya kay ang ubang mga tawo gahi man og ulo bisan delikado na ang kahimtang mamasin pa man nga luwas gihapon sila, hasolan na mohikling o ang uban mahadlok nga makawatan maong magpabilin sa ilang mga pinuy-anan, ayha na molihok kong ulahi na ang tanan.

Ang nahitabo sa Busay angayan nga himoong sumbanan sa paghikling kay pastilan kong nagmagahi ang mga tawo segurado gyud nga dunay trahedya nga nahitabo.

Ang Mines and Geosciences Bureau kon MGB nagpahigayon og inspection sa dapit ug nasuta nila nga humok ang yuta kay agianan diay kini sa tubig nga na-condemn na tungod sa gitukod nga mga balay sa dapit.

Nakita sa mga experto nga dunay tubod sa tubig ang yuta nga gitarokan sa mga pinoy-anan busa humok gyud kini ug gisamotan pa sa walay hunong nga ulan mugna sa bagyong Paeng nahulpa gyud hinoon.

Makita pud nato dinhi nga dili gyud angayan poy-an kining ingon niini nga dapit kay peligro kaayo, seguro sa sinugdanan makaingon ang mga tawo nga madala ra og ayum ayum ang yuta kong abunohan.

Maayo lang sa sinugdanan apan dunay mga factor nga makahatod sa pagkahumok sa pundasyon sa yuta sama sa ulan nga sa ngadto ngadto maghatud og kadaut sa mga nagpuyo.

Ang dapit girekomendar nga no-building zone kay peligro kaayo nga pabalikan pa sa pagpuyo, angayan seguradohon ang kaluwasan sa kinabuhi kay sa mahinugon sa kabtangan nga gilamoy na sa pwersa sa kinaiyahan.