Kadaugan ug pangalagad

Dili pa lang dugay nitambong ko og usa ka birthday celebration cum thanksgiving sa akong mga higala nga sila si kasamatangang Mayor Richard Streegan ug Vice Mayor ug karon Mayor-elect Moonyeen Durano Streegan didto sa Sogod. Tua usab didto ang atong governor nga si Gwendolyn Garcia ingon man ang ubang mga opisyales local man ug sa Hunta Probinsiyal. Nitambong kinit ungod kay personal man akong gidapit nilang Mayor Richard ug Vice Mayor Moonyeen nga maoy mosaulog sa Santos nga Misa alang kanila. Tuod man nahigayon gyud kini.  Nahatagan pud ako og kahigayonan nga makapaminaw sa ilang mga diskurso. Kuyog nako si Padre Maloy ang nipuli kanako didto sa Mohon, Sogod. Ang hilisgutan nila naghisgot man sa kahiusahan.

Kay unsa ba gud ang kahiusahan? Kahiusahan taliwala sa mananglahing baruganan ug gigikanan? Kahiusahan alang sa kaayohan sa kinabag-an mas makahuloganon dili ba? Mao na ba kaha kining panahona nga nahtagan og igong katumanan ang m ga panlantaw sa mga new agers nga karong mga panahona panahon na ni Aquarius ug dili ni Pisces.

Nagsugod na ang laing era diin nahimong pahimug-atan ang kaayohan sa kinabag-an over and above sa kaayohan sa pipila. Ug kun ugaling hatagan og igong gibug-aton ang community life pwede ba kaha nga ang community life nga ilang giingon mamahimong hinungdan usab sa giingon nilang pugosong pag-impementar sa bisan unsang giisip nilang makaayo kuno sa kadaghanan. Komplikado dili ba?

Apan sa maong panagtagbo mapasalamaton kaayo ako kang Auntie Brenda ug Uncle Joel nga padayong ni supply kanako sa akong kapritso sa libro. Ang mga libro nga akong nakuha karon mao man kadtong mga lbiro sa pag-ampo segun sa balaod ni San Benito. Akong mga panghinaut nga sa akong paggamit ning maong mga libro mas mapaladman ko pa og samot ang akong pagsabot sa unity. Unta mapapas ang bisan unsang bias nga naglimin kalabot niini. Landslide man tuod ang kadaugan apan wala kini magpasabot nga angayang magmapahitas-on ang nakadaug. Himoon unta kining sinugdanan sap ag-amgo nga dunay nisalig sa maong katakus busa kun unsa man ang nahimong saad dili gyud angay pakyason.