Nakabuak og bildo sa sakyanan ang mga bata, kinsay manubag?

Dear Atty. Divine,

Ang mga bata sa among silingan nagduwa sa among tungod. Ilang gilabay og bato ang iro ug ang bato didto napunta sa akong sakyanan nga naka park atubangan sa akong balay ug nabuak ang windshield niini human maigo sa bato. Akong giadto ang parents sa mga bata ug akong giingnan nga bayran nila ang pagpailis sa akong windshield. Apan di sila mobayad kay mga minor daw ilang mga anak ug wa kini tulubagon basi sa balaod? Husto ba ang ilang depensa? Unsay angay nako nga buhaton? Daghang salamat. — Roland

* * *

Dear Roland,

Basi sa Article 221 sa atong Family Code, kini nagkanayon nga ang mga ginikanan sa mga minor de edad nga anaa ubos sa ilang parental authority adunay tulubagong civil kun ang bata  makahimo og kadaut . Mismo ang Korte Suprema sa ilang mga nahaunang desisyon nagkanayon nga ang civil liability nga gi imposed ngadto sa ginikanan sa mga bata nga nakahimo og kadaut o damages kini nagagumikan kay siya man ang adunay parental authority sa usa ka minor de edad, buot ipasabot nga ang ginikanan adunay nahimong pagpabaya sa iyang pag-supervise sa bata nga anaa sa iyang control and custody.

Busa sa imo nga kaso, adunay tulubagon ang mga ginikanan sa mga minor de edad nga nakabuak sa imong windshield ug angay gyud kini nilang bayran. Ang pagka minor de edad sa bata magamit lang nila nga depensa sa kriminal nga kaso kay ang atong balaod adunay provision nga nagkanayon nga walay criminal liability kadtong mga minor de edad nga makahimo og krimen gawas lang kun nasayud na siya ug nakasabot na sa iyang gibuhat or with discernment. Ang imong buhaton karon  mao ang pagpasaka og reklamo sa barangay batok sa mga ginikanan sa mga bata aron pag areglo sa inyong problema. Thanks and God bless. — Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.