Ang monghe

Ang pulong monghe gikan  man sa Griyegong pulong Monos kun nag-inusara. Ang mga ascetics kadtong nagbansay og mga sakripisyo, disiplina ug uban pang balansayon sa pagdumili sa kaugalingon.

Sa laing bahin, anaa usab ang termino nga eremos diin gikan niini ang pulong ermitanyo nga nagpasabot og pagpalayo ug pag-inusara. Anaa usab ang mga cenobites gikan sa Griyego nga Koinos Bios o nagluon pagpuyo. Anaa silay kaugalingong oratorium nga nagpasabot og dapit sa pag-ampo diin isip usa ka katilingban sila nag-ampo ug nagdayeg sa Dios. Nahimong usa sa mga inila nga monghe ug magtutukod og mga monasteryo ug giilang amahan sa monasticismo sa kasadpan mao man si San Benito sa Nursia. Nahimo siyang inila diha sa iyang pamalaod nga ORA ET LABORA.

Ako kining gipaambit tungod kay ang mga monghe ug ang kinabuhi sa monasticismo dako man kaayo og kahimoan labina gyud sa mga higayon nga ang simbahan nakasinati og dulom nga krisis ug suliran. Ang mga monasteryo nahimong powerhouse sa simbahan niadtong middle ages. Gani nahimo silang dalangpanan sa katawhan sa Dios ug sa sulod mismo nila natago ang mga bahandi dili lang kalabot sa bisan unsang material kondili bahandi sa kahibalo ug katitikan. Daghang mga papa ang naumol sa ilang natad. Daghan kanila ang nahimong mga sinaligan mismo sa atong simbahan.

Ning panahon karon sa gitawag nilang kabag-ohan nahimong daw nahiklin ang bili sa pag-ampo ug kahilom. Daw lisud kaayo ang pagkab-ot sa kahilom. Kini tungod kay ang mga tawo ning atong kapanahonan karon buot man gyud og masaba nga pakigpulong ug daw ang kahilom malisud man gyud kab-oton. Allergic kita niini tungod sa mga rason:

1. Diha sa kahilom makita nato ang atong kaugalingon ug daghan nato ang dili buot mosud-ong niini.

2. Ikaduha, naa ang Dios diha sa kahilom apan ang presensiya sa Dios alang natong mga masalaypon makapaso man gyud kaayo.

Ang kinabuhi sa mga monghe ug kanilang mipalayo sa kagahob unta magdasig kanato sa usa ka maampoong panlimbasog. Diin ang mga tawo moduol kanato aron magdala kanato sa ilang mga pangilaba ug pag-ampo.