Halandumong adlaw

Akong gisaulog ang akong adlaw nga natawhan diha sa kayano ug kamakahuloganon.

Ning paagiha angayan lamang nga magpasalamat sa Ginoo kay bisan sa mga hitabo nia ako buhi pa gihapon ug nakapadayon sa akong naandang mga buluhaton.

Sa laing bahin, akong gipamalandongan ang akong role sa kinabuhi.

Dili na gyud ko batan-on padulong na gyud ko sa katigulangon ug kini ang hinungdan kun nganong angayan nakong mag seryoso sa tanan nakong pagahimoon sanglit ang pagtungtong ning edara sinugdanan man lamang sa mas lain pang panaw padulong sa mas hilom, hamtong ug mabulukong kinabuhi.

Salamat sa Dios kay gihatagan ko og kahigayonan nga mabuhi hangtod karon.

Salamat sa mga parokyano nga padayong mihatag sa ilang kaugalingong panahon diha sa mas suod nga kalambigitan. Yano raman tuod ang ilang mga hinatag apan sayud ko nga gikan gyud kini sa ilang kasingkasing.

Salamat kaayo sa maong kahigayonan ug nahimong malampuson gihapon ang pamukaw, misa ug ang yanong salo salo.

Dunay panultihon nga nagkanayon: “ What you are is God’s gift to you and what you are is your gift to God!” Halandumong adlaw sa pagpasalamat sa Gasa sa Kinabuhi apan, sa laing bahin, tahas nga mamahimong mabungahon ang nahabiling gutlo sa kinabuhi. Igahin kini sa paghimo og maayo ug ang pagtabang sa uban.

Mas maayo man gyud nga mahinumdoman kita dili sa atong mga napondar kondili sa atong nahimo ug sa atong nahatag ngadto sa uban.

Apil na niini ang atong panahon ug ang atong kasingkasing. Ning paagiha mamahimong mas makahuloganon ang tanan ug makahuloganon ang matag usa kanato.

Kanila nga nagpakabana salamat kaayo. Kanila nga nag-ampo alang kanako salamat kaayo ug kanila nga sa matag karon ug unya padayong nangita sa akong mga buslot ingon tawo.

Salamat kaayo kay ang maong paghukngay maoy nakapadasig kanako sa pagpaningkamot.

Salamat kaayo Ginoo.