Traffic lights pangilisan na

Sa dili madugay, pangilisan na gyud ang mga karaan ug gubaong traffic lights dinhi sa Dakbayan sa Sugbo. Akong nahibaw-an nga gastohan sa City Hall og P232 milyones kapin ang maong proyekto.

Tukma kaayo ang gihimo ni Mayor Edgardo Labella nga pagpangilis sa karaan na kaayong traffic lighting system sa siyudad nga gitaod kaniadto atol sa unang termino ni kanhi mayor Tomas Osmeña.

Kining mga traffic lighting system nga makita pa nato karon, mao ni ang gitawag og Sydney Coordinated Adaptive Traffic System (SCATS), nga gitaod sa usa ka kompaniya gikan sa Sydney, Australia.

Kaniadto ang Cebu City maoy dunay labing moderno nga traffic lighting system nga “automatic” nga mokontrol sa trapiko. Ang mga eskina gibutangan og mga detectors nga moila hain sa mga karsada ang mas daghan og sakyanan.

Kadtong mga karsada nga daghan kaayo’g sakyanan, ang SCATS mopasiga sa “green signal” og mas dugay aron mahurot-hurot ang mga moagi nga sakyanan.

Apan kon masuta sa detectors nga pipila na lang ka sakyanan ang moagi, automatic niya nga i-STOP ang signal, ug kadtong sa pikas mao na usab ang iyang i-green ang traffic signal.

Paglabay sa mga 40 ka tuig, nangaguba ang mga wire connections sa SCATS ug angayan na nga ilisan aron makatabang pagpahapsay sa trapiko sa dakbayan.

Ang isyu sa traffic, usa sa gisaad ni Mayor Labella nga iyang hatagan og dakong pagtagad, apil ang problema sa paglunop sa mga lupa nga bahin sa siyudad ug ang problema sa basura.

Nakaingon ko nga tukma kaayo ang pag-ilis karon sa karaan na nga mga traffic lighting system, kay ang SCATS gipataod atol sa termino kaniadto ni Osmeña, ug si Labella maoy mopabag-o niini.

* * *

Ang pagsulbad sa problema sa baha dinhi sa Dakbayan sa Sugbo, angay gyud sab nga hatagan og pagtagad ni Mayor Labella. Natan-aw nako nga wa kaayo ni matutoki pag-ayo sa iyang mga gisaligan.

Nakita nako nga samtang busy kaayo si Mayor Labella sa mga gimbuhaton, ang pipila niya ka sakop nagpabaya lang sab sa ilang mga katungdanan.

Dunay mga sapa nga angayang himoan og pagpalawom, ingon man palapdan kay nag-anam na kagamay, apan wa nila kini himoa. Mangita mo og sampol?

Tan-awa kanang sapa nga milagbas sa Sikatuna Street duol sa eskina Sikatuna ug Bonifacio. Tungod sa kahakog sa pwesto sa mga tag-iya og building diha, migamay ang sapa nga agianan unta sa tubig.

Mao kana nga kon may uwan, maglunop dayon. Ang taytayan diha lapad, pero ang sapa gamay na. Makita sa taytayan nga natukod ni 1940, sa ato pa, lapad ang sapa kaniadto, ug karon nahimo na lang kanal.