Ang tumong ug bili sa imong kinabuhi mao man ang imong gahum

Ning panahon sa dakong kalisdanan, daghan nato ang tingali wala makapangutana kun nganong nia pa kita dinhi ning kalibutana nagginhawa pa.

Nahimo kitang bilanggo sa naghinobrang kahadlok kun unsaon pagpakabuhi.

Alang nako, dunay rason kun nganong nia ta hangtud karon: Kini nagpahinumdom kanato nga:

1. Ang kalipay dili diay moabot lamang kanato. Ang kalipay kinahanglan nga atong desisyonan.

Ang kalipay mahimo gihapong sination bisan pa man kun anaa kita sa dakong kalisdanan.

2. Ang kalipay dili lang diay kinaugalingon nga panlimbasog.

Mas maayo nga kun malipay ta personal mente, makahatag pud unta kita og kalipay ngadto sa uban. Kalipay nga dili lang ma limit sa bisan unsang kalibutanon ug tawhanon kondili kalipay usab nga espirituhanon.

3. Ang kinabuhi tawag sa pagkabalaan. Wala kini magpasabot nga kinahanglan gyud natong mamatay aron lang mamahimong santos.

Hinunoa, ang paghimo og mga yanong bulohaton nga dunay dili kasarangang  paghigugma dako naman kaayo og kahimoan aron kita makakita sa hinungdan kun nganong nia kita ning kalibotan aron human kita mabalaan kita mismo sa atong kaugalingong paagi ang makabalaan usab sa uban.

4. Ang kinabuhi naumol sanglit kahimanan man kini sa pag-alagad sa atong isig kaingon bisan lamang sa yanong pamaagi.

5. Ang kinabuhi diay di lang mahitungod kun unsay imong nahuman kondili mahitungod kun unsang proseso ang imong naagian aron sa ingon mas makasabot ang hingtungdan sa bili sa iyang pag-antos.

6. Bisan unsaon anaa gyud ang pag-antos kay diha lamang sa pag-antos mas mabaid ang atong salabotan diha sa pagsabot nga ang kinabuhi diay bisan og unsaon dili sa tanang higayon hayahay.

7. Matag kinabuhi dunay katapusan. Sa dili pa kita matapus ug mapagngan sa gininhawa, atong himoong mas makahuloganon ang tanan pinaagi sa paghatag og bili sa matag usa nga nagpalibot kanato.