Obey first before you complain

Giawhag sa DILG ang mga lokal nga kagamhanan sa pag-establisar og mga bicycle lanes aron maseguro nga luwas sa peligro kadtong mga magbisekleta lang padulong sa ilang trabahoan.  Wala pa mahibaw-i kon nakig-coordinate ba ang DILG sa DPWH bahin sa teknikal nga aspeto sa bicycle lanes. Wala usab maklaro kn mohatag ba og pundo ang DILG ngadto sa lokal nga kagamhanan aron mapatuman ang maong kamanduan.  Mipatigbabaw pa gihapon ang pagka-military ni Sec. Año diin ang motto mao ang “Obey first before you complain”.  Faeetz!

Mao ra’y silot ang disgrasya

Gikataho nga ang mga opisyales sa Yamato City, Japan misumiter og balaodnon ngadto sa city assembly nga magdili na sa katawhan paggamit sa cell phones samtang naglakaw sa dalan. Tumong sa maong balaodnon nga mapugngan o mamenosan ang mga aksidente nga mahitabo sa dalan gumikan sa pagyampungad sa cell phone.  Apan wala maglatid ang maong balaodnon og silot alang niadtong dili motuman.  Tingale, alang sa naghimo sa balaod, igo na nga silot ang disgrasya nga mahiagoman unya sa mga malapason.  Baya no!

Sadista ba ang LTFRB?

Kakulang sa sakyanan ang nasinati sa mga trabahante nga mibalik na sa trabaho niadtong Hunyo 1, 2020, ang unang adlaw  sa pagpaubos ngadto sa GCQ sa dakbayan sa Cebu ug Mandaue.  Apan alang sa taga-LTFRB, “NORMAL” lamang ang maong panghitabo kay diyotay pa man ang ilang gitugotan nga mobiyahe.  Nasayod na diay daan ang LTFRB sa sangputanan apan wa gyud nila pabiyahe-a ang mga jeepney.  Wala ba sila bati-a’g kalooy sa natanggong nga mga trabahante?  Sadista tingale ang LTFRB!

Dep’t of exterior na lang

Gibalibaran ni Secretary Año sa DILG ang hangyo nga tugotan na ang pag-backride sa mga motorsiklo, bisan sa miyembro lang sa pamilya.  Dugang pa ni Sec. Año, nga mas maayo pa nga butangan og side car ang mga motorsiklo aron kini masakyan sa uban.  Kulang sa pinsada ang maong kamanduan.  Kabos ang katawhan ug lisod tungason sa sidecar ang kabukiran. Komedya pa sa akong amigo, “INTERIOR ra ba diay gayod ang panglantaw sa DILG?”. Maayo pa ilisan ang ngalan sa ilang buhatan ngadto sa “Department of EXTERIOR and Local Government” aron makita usab nila ang kahimtang sa gawas.  Hala no!

Paglingaw sa kaugalingon

Mipasaka ug petisyon sa Korte Suprema ang kanhi Law Dean sa Laguna State Polytechnic University nga si Atty. Jaime Ibañez, aron ipa-anular ang RA 11469 kon “Bayanihan to Heal as One Act tungod kay ‘unconstitutional’ kuno ang maong balaod.  Ngano’ng karon pa man? Tulo ra ka buwan ang effectivity sa balaod nga nagsugod niadtong Marso 25, 2020, gawas kon lugwayan sa Kongreso.  Apan sagdi na lang kay ang tanan ni’ng kalibutan may katungod man sa iyang kaugalingon’g kalingawan.  Madahaan!