Wa kaha masayop ang projection?

Gitataw ni Cebu City Legal Officer Rey Gealon nga ang quarantine center nga anaa mahimutang sa North Reclamation Area, andam na modawat og mga pasyente nga adunay mild to moderate symptoms taliwala sa pangutana ngano nga wala pa gamita ang pasilidad. Segun sa pagtuon sa Center for Disease Control and Prevention, sagad 20% lang sa mataptan sa COVID ang magkinahanglan og dugang pag-atiman.  Sa kahimtang karon, adunay posibilidad nga dili na gayod magamit ang maong quarantine center. Wala kaha’y nasayop sa ilang projection? Hala no!

Baligho apan makatarunganon

Gawas sa NRA Quarantine Facility, gitugyan na usab ang Bayanihan Cebu Executive and International Eucharistic Congress (IEC) Field Center ngadto sa Department of Health.  Ang bag-ong pasilidad makadawat ug 130 ka COVID patients. Bisan pa man sa pag-turn over sa maong pasilidad, nag-ampo gihapon ang mga nagpaluyo sa proyekto nga dili lang unta kini magamit. Alang kanila, mas maayo nga anaa ang pasilidad bisan di gamiton kaysa magkinahanglan kita apan walay magamit.  Baligho paminawon apan makatarunganon.  Padayon gihapon ang pakigbatok sa COVID! Saoonz!

Mapagan ang hulmigas

Mimando si Chinese President Xi Jinping ngadto sa armadong kusog sa China sa pagpalig-on sa ilang pagbansay og pagpangandam sa gubat taliwala sa COVID-19 pandemic. Mitumaw ang maong kamandoan taliwala sa nagkataas nga tensiyon tali sa Amerika ug China human giingon nga namasangil ang Estados Unidos ngadto sa China nga maoy nagpasiugda sa pandemic. Kon di mosalir ang diplomasya, mahimong moulbo ang away sa US ug China.  Kon mag-away ra ba ng mga elepante, maukay gyud pag-apil ang mga hulmigas nga nagkamang sa yuta nga ilang gitumban.  Faeetz!

Hiposon lang una ang kabataan

Nagkadaiya ang reasksyon sa pamahayag ni Presidente Duterte nga dili niya tugtan nga mag-abli ang klase hangtud nga aduna na’y madiskobre’ng bakuna  COVID-19. Matud ni Antonia Lim, Regional Head sa Alliance of Concerned Teachers (ACT) Party List, namiligro ang panginabuhian sa mga magtutudlo nga mawad-an og trabaho.  Apan alang sa mga ginikanan, dili una sila ganahan morisgo pagpaeskwela sa ilang mga anak.  Daw manok nga himongaan, nagkanayon ang mga inahan, “Inyoha na lang ang eskwelahan, amo lang una hiposon among kabataan”.  Madahaan!

“I am a medical reservist”

Mipasaka og balaodnon si Senator Bong Go nga mag-umol sa Medical Reserve Corps (MRC).  Ang tumong sa maong balaodnon mao ang pagpalambo sa kapasidad sa nasud nga motubag sa mga national health emergencies, pinaagi sa pagtigom sa mga medical ug health-related professionals aron moabag sa kagamhanan sa panahon sa krisis.  Angayan nga ilhon ang mga medical professionals isip bayani niining gubat batok sa COVID-19.  Hayan kanunay na unya kita makakita’g nameplate o car sticker ba kaha nga adunay mga titik nga nagkanayon, “I AM A MEDICAL RESERVIST.” Hala no!