Wala mokubit si Labella

Maayo na lamang nga wala mokubit si Cebu City Mayor Edgardo Labella sa mga pika ni Bise Mayor Michael Raman kinsa misaway nga dili kuno maayo nga pagdumala sa executive department sa krisis sa Coronavirus Disease-19.

Nasagmuyo si Rama gumikan kay wala kuno manumbaling si Labella ug ang executive department pagkonsulta sa konseho sa ilang mga lakang sa kampanya batok sa COVID-19.  Sa akong nakita, grabe gayud ang kahiubos ni Rama.

Apan gibaliwala kini ni Labella. Matud sa mayor, mas mo-focus na lamang siya sa iyang trabaho ilabina niining dakong problema sa corononavirus nga mihapak sa dakbayan ug mitamboy og subra sa usa ka gatus ka tawo.

Maayo na lamang kay wala gayud nagpadala si Labella sa labtik ni Rama. Kay kun mitumpang pa ang mayor sa pasaringsaring sa iyang bise mayor, basin kun mawala ang iyang focus sa kumbati batok sa makamatay nga virus.

Daghan ang nakabantay nga wala gayud sa tuno ang panaway ni Rama. Bitaw. Ania kita sa seryosong kalisdanan ug angay lamang nga ihikling una niniing atong mga lider ang politika. Mas angay pa gani nga moduyog si Rama sa mga lakang sa mayor sa pagpakigbatok sa dakbayan sa COVID-19.

* * *

Apil ang dakbayan sa Sugbo ug ang probinsya sa mga lugar tibuok nasud sa rekomendasyon ngadto sa national government nga lugwayan pa ang pagpatuman sa Enhanced Community Quarantine sa padayong kampanya batok sa Coronavirus Disease-19.

Kini basi usab sa rekord nga nagpakita sa padayong pagsaka sa kaso sa mga nataptan sa COVID-19 niining mga lugar, ilabina dinhi sa Sugbo diin migrabe ang sitwasyon ug nagkadaghan ang naigo sa maong sakit.

Mao nang gisugyot sa Inter-Agency Task Force for the Management of Emerging Infectious Diease ngadto kang Presidente Rodrigo Duterte nga i-extend una ang pagpatuman sa ECQ sa pipila ka lalawigan.

Insakto lamang ang lakang paglugway hangtud sa Mayo 15 sa ECQ nga nagsugod niadtong Marso. Sa pagkakaron, atong nakita nga padayon nga misaka ang kaso sa COVID-19 sa nasud ug angay lamang nga i-extend ang quarantine.

Kini lamang ang paagi nga makontrolar ang padayon nga pagkatap sa maong virus. Kay mora og hilaw pa kun libkason na ang ECQ. Taliwala niining mga yangoyango sa pipila batok sa ECQ extension, angay lamang nga dili molugat ang kagamhanan tungod kay basin unya kun mosulbong na hinuon ang mga kaso sa COVID-19.