Tungod sa corona

Daghang mga natural resources ang nabiktima ug gipahimuslan sa mga langyaw kang kansang hunahuna puno sa ginansiya. Tungod sa corona daghang mga yanong kanasuran ang niyukbo sa dragon aron lamang magpakabuhi ning kalibutang lumalabay.

Tungod sa corona daghang mga tawo ang nagpakatap og mga fake news. Ug dili lang kay fake news mga balita o impormasyon nga imbis makatabang naghaling man nuon sa kaligutgot. Matang sa kaligutgot batok sa relihiyon aron sa ingon dunay rason ang bisan kinsang nagpakagamhanan aron kining maong simbahan lutoson ug paphaon na gyud sa hingpit.

Apan bisan unsaon man tuod kini og papha dili kini mahitabo. Mahimong sirado ang mga buildings karon apan nahimong abli ang mga simbahan sa tagsatagsa ka mga panimalay. Kining maong kahimtang nato karon angayan lamang nga pabilin kitang determinado nga barugan ang unsay maisip natong maayo ug dili ang bisan unsang pagaisipon natong makadaut. Kay ang negatibong hitabo kondili mabantayan makahimo man og kadaut sa atong tagsa tagsa ka mga mental nga kahimtang.

Tungod sa corona nahimong daw sa halayo alang nato ang physical nga paghikap sa usag usa. Ang paglikay niining maong buhat nahimo namang timaan sa paghigugma. Ang pagpalayo sa tagsatagsa mao naman hinuon ang nahimong basehan aron kita mabuhi ning kalibotan karon nga puno kaayo sa kawalay kasegurohan. Ang  kalibutanong kabalaka maoy nakapaaghat sa pipila sa pagpangindahay sa espirituhanong langit.

Sa laing bahin, ang kinaiyahan nato karon nahimong nakuratan usab. Nakuratan tungod kay bisan ang mga langgam ingon man ang mga dulon didto sa Africa kaha tingali gigutom na mao nga ning maong panahon sa dakong kalisdanan nahimo silang mga gutom ug uhaw sa kabusganan.

Gani, mahadlokon kaayo ang mga syentipiko sa Estados Unidos nga simbako nga wala na gyuy makaon ang mga ilaga didto nga nanginabuhi sa mga basura ug mga salin nga kalan-on ang mamahimong mga agresibo ug tingali mokaon na og mga tawo.

Ang atong ekonomiya nahimong hagbong na. Pun-an pa nga giingon sa mga langyawng Insik nga maglisud ang Pilipinas sa pakigbatok ning maong corona ug ang implikasyon niini mao nga kinahanglang magsalig na gyud nuon ta kanila.

 Sama kita sa mga ilaga nga kun mahikawan na sa basura ang mamahimong magpangita na lamang sa atong isigkaingon aron atong himoong timo sa pamasin nga malugwayan pa ang atong hamubo ug himatyong kinabuhi.