Kandila

Kaniadto niadtong wala pa mauso ang sugang dagitabnon sa among dapit, kuntento kaayo ko sa suga sa gaspen o dili ba kaha sa kandila.

Samtang nagtuon ko kaniadto kining maong  matang sa banwag ang akong kauban samtang akong gipakli pakli ang matag anib sa mga libro nga PRODED UG SEDP kaniadto. Nindot ang maong mga libro sa tinuod lang ug gani magsangkiig ko pagdala dala niadto.

Nindot ang mobasa ug kabahin sa akong kinabuhi ang pagbasa. Nanumbalik ang maong kasinatian tungod ning maong hitabo karon. Tungod ning hitaboa naikag ako kuyog sa akong mga kaubanan sa prokya nga mohimo og Mobile Procession sa among Segunda Patron nga si San Roque ingon man sa Balaang Bata gyud Mismo.

Gani ang mga parokyano sa tagsa tagsa nila ka mga panimalay ang modagkot man gyud og kandila ug mag-ampo sa ilang nataran sa panahon nga moagi na ang mga Imahen. Makapatandog ang maong talan-awon kay makita mo sa mga mata sa matag tawo ang dakong tinguha gyud unta nga mosimba ug mag-ampo kuyog sa kadaghanan apan gumikan ning maong Covid-19. Ang tanan nahimong hinay ug dili normal tungod ning maong pandemiko.

Sa laing bahin, ang mga sakop sa International Association of Exorcists nitataw nga ning maong kahimtang karon, nahimong mas nigara ang lihok sa Yawa. Kini tungod kaya ang mga tawo o ang katilingbang Kristohanon sa tibuok kalibutan ang nahiagom man sa paghikaw nga makadawat sila sa balaang lawas ug dugo diha sa Santos nga Misa.

Bugtong ang Espirituhanong Pagkalawat mao na lamang ang mabuhat natong tanan. Dili ba subo kini? Apan kun naa ang Kandila nga dinagkotan matag gabii mamahimong hapsay ang tanan. Kini tungod kay ang pulong KANDILA nagpasabot man og:

Kristo: Si Kristo dili lang ang katapusang Sangpiton ning maong Pandemiko kondili matag takna angayan siyang sangpiton.

Aninawa ang imong kaugalingon dayon ang imong palibot. Dili kini panahon sa pagpangutana og UNSAY AKONG MAPAABOT? Kondili UNSAY AKONG MABUHAT? Aron ka makatabang ning atong katilingban karon.

Negosyo o Relasyon? Asa man ang mas bililihon?

Tinuod kadaghanan nato nagkinahanglan og salapi ning panahon sa kalisod apan unta dili nato kini himoong prayoridad. Kay dunay  mga tawo nga pwerte makapahimulos. Imbis motabang, tabang man nuon og duot!

Damgo. Matag usa nato kinahanglang magdamgo panahon sa katulogon ug panahon sa atong pagmata. Damgo matud pa, salamin sa atong mga kabalaka ug  mga tinguha.

Busa angayan lamang nga magdamgo ta nga dunay nindot nga mahitabo human ning maong krisis. Kay kini man ang naghatag kanato og kahulogan ug tumong sa atong kinabuhi. Kun wala kitay damgo unsaon man tuod nato paglahutay?

Ila-Ilaha pag-usab ang mga sakop sa imong banay kay ang home quarantine nga nasinati kahigayonan man nga mas masuod mo ang mga sakop sa imong pamilya.

Limot-limoti ang mga adlaw nga puno sa mga kabalaka. Hupti ang positibo nga panghuna huna ug pagbati. Kay ang negatibong disposisyon makapasamot man nuon sa kalaay n ga gihambin.

ANGKONA nga sa kinabuhi diay dili tanan haruhay ug sayon. Moabot nga krisis sa higayon nga dili nato damhon mao nga pangandam na! Kay kining kasinatian karon nagpahinumdom kanato nga dili gyud kita andam busa angayan lamang nga magmatngon na kita sunod!

Ang kandila mahimong nabiyaan na gumikan sa sugang dagitabnon apan siya ang kalauman kun dagitab nga suga dili na molihok. Mahimong mawala gikan nato ang tanan dili lang ang paglaum.