EDITORYAL - Bendisyon sa Lukay diha sa balay

Karong adlawa mao ang pagsaulog sa Domingo sa Lukay o Palm Sunday nga mao ang adlaw sa pagsugod sa Semana Santa. Labing una kining higayon nga sugaton sa mga magtutuo sa Simbahang Romano Katoliko ang Semana Santa diha lang sa ilang tagsatagsa ka mga balay tungod sa hulga sa coronavirus (COVID19).

Ang Simbahan mipahunong sa tanang mga relihiyoso niining kalihokan agi og kooperasyon sa panawagan sa gobiyerno nga mag social distancing ang katawhan aron mapugngan ang paspas nga pagkatap sa virus.

Ang Bendisyon sa Lukay, nga maoy usahay tawag sa mga Bisaya sa maong adlaw, mao ang adlaw nga misulod si Hesus sa Jerusalem nga diin usab siya lutoson ug ilansang sa krus. Nagpalansang siya sa Krus tungod sa Iyang dakong gugma sa tawo aron maluwas sa sala.

Ang pagsaulog niini bisan diha lang sa balay basta kinasing-kasing walay kalainan sa pagtambong sa aktwal nga Santos nga Misa diha sa simbahan.

Kay maunsa raman ang pagtambong sa misa kun ang kasingkasing wala sa selebrasyon tungod kay nakapokus na hinuon sa ilang mga selfies, Twitter, Facebook aron lang ma-updated ilang social media life.

Di sab angay ikaguol kun way lukay nga mapabendisyonan karong adlawa gumikan kay simbolo ra kini sa aktwal nga nahitabo didto sa Jerusalem. Ang mahinungdanon mao ang naa sa kasingkasing sa mga magtutuo nga nahitabo kadto kaniadto.

Ang nakanindot sa karo itandi kaniadto, magkauban ang tanang miyembro sa pamilya sa usa lang ka tumong karong buntag. Ang pagpaminaw sa Santos nga Misa sa pagselebrar sa Palm Sunday.

Samtang nagtimaan ang katawhan ning adlawa, maayong ibubo ang tanan sa pagampo nga mawagtang na ang coronavirus (COVID-19) nga nipatay na og daghang kinabuhi , nakapasakit sa daghang mga tawo ug nakapalisang sa tanan.

Angay sab iampo sa katawhan kadtong mga natakboyan nga padayong nakigkombate pa sa maong sakit aron makalingkawas. Iapil sab ang mga frontliners sama sa mga doctor, nurses, medical staff, mga polis, sundalo, bombero, volunteers, mga opisyales sa gobiyerno nga malikay sila sa maong balatian ug makakita na unta og bakuna, tambal batok niini.