Linog sa Mindanao

Sa akong pag tan-aw sa mga newsfeed sa akong FB, ang akong mga kababata kaniadto sa Davao ang kanunay mo update kanako kalabot sa linog nga nahitabo didto. Ako usab nibati og kabalaka kay unsa man ning pagkaestoryaha nga wa man gihapon mapul-i tawon kining maong linog. Nagsige man nuon kini og balikbalik ug nagbalhin balhin pa og epicenters may kaugalingon ba kaha kining hunahuna ug kabuot?

Ambot lang pangagpas lang pud kining akoa. Apan ang dugokan mao nga hasta ako gikuyawan basin og dunay mas dako pang linog nga moabot nga ginganlan og The Big One mao nga nahitabo kining mga tinagsip nga linog sa maong dapit. Unstable na gyud tingali ang ilawom sa yuta mao nga nahitabo kining mga butanga.

Sa akong pagpamalandong, mahimong sabton nato ang linog dili lang gyud sa aktwal nga kahulogan niini kondili mamahimo usab nga tan-awon nato ni ingon nga simbolo sa kahimtang sa atong kinabuhi. Dunay mga higayon man gud nga nahimong mas guol ang atong kahimtang tungod kay haguka ug kanaunay tay-ogon ang atong pagkatawo.

Mao tingali matud pa nga ang nagdamgo nga sila gilinog mao tong mga tawo nga maglisud og pokus tungod kay daghan og mga kabalaka ug kakuyaw nga gihambin sa ilang kinabuhi. Mao nga gamay’ng lihok sa ilang palibot bation dayon nila ang katarantar.

Sa laing bahin, ang maong linog nga nasinati sa atong mga kaigsuonan nahimong sukaranan nga bisan asa ning kalibutana anaa gyud ang dakong posibilidad sa pagtay-og. Hinog na gyud ang kalibutan ug higayon na usab tingali nga mohimo siya og adjustments aron siya padayong moginhawa ug mabuhi.

Padayon siyang mabuhi tungod kay ang pagpakabuhi niya gikinahanglan man aron mabuhi usab ang ubang organismo nga nagpahimulos sa iyang paraiso apil na niining mga tawo sama nato.

Bugtong pag-ampo lang gyud ang atong mahimo ingon nga paagi aron sa ingon mahilayo kita sa mga katalagman. Sa laing bahin, ang pagtay-og unta magdapit kanato sa pagpadayag sa atong pagpakabana sa usag-usa kanato ning kinabuhia.

Kay walay gaba o silot gikan sa kahitas-an mao nga nahitabo kining mga katalagman kondili pahinumdom kini nga ang tanan dunay kaugalingong kinutoban ug matag linog ug bagyo kabahin lamang sa lihok sa kinaiyahan. Busa iampo nato ang Mindanao labina gyud sa Davao.