EDITORYAL - Pamatasan karon ug sa kaniadto

Makamingaw kaayo karon kaning pamatasan sa mga kabataan kaniadto nga mangataruhan kun magkasugat sa dalan, matiguwang man o kaedad ang magkatagbo. Batakan kaayong maayong gawi sa usa ka batang Pilipino.

Karon, ang mga anak dili na gani mangatahuran sa ilang mga ginikanan bisan diha sa sud sa ilang panimalay.

Menus ka kaayo nga mo-amin sa mga katiguwangan ug mga ginikanan ang mga bata ini og sawop sa adlaw. Tungod ba sa ka busy o tungod kay “lahi” na ang kabataan karon?

Tungod kay kaniadto apil gyud sa gitudlo sa elementarya ang Good Manners and Right Conduct (GMRC), gani may grado gyud kini mao nga lahi ra gyud ang kinaiya ug pamatasan sa mga kabataan kaniadto ug sa karon.

Makita dayon sa ginikanan kun badlungon ilang mga anak diha sa ilang tunghaan base palang sa grado ug makatabang sila pagpitol sa mga bata.

Sa pagkakaron, dili na kaayo pokus ang mga magtutudlo sa pamatasan kondili sa leksyon nalang. Usa pa, magpanagana ang mga magtutudlo kay dunay mga ginikanang manuyo kun pitolon ang kasuwail sa ilang anak. Sayo ning buwana, giaprubahan sa kataposang pagpasab sa Ubos Balay Balauranan ang House Bill 5829 nga nagtinguhang iapil sa curriculum kindergarten hangtud sa Grade 3 ang GMRC.

Pinaagi niini, dili lang ang mga ginikanan maoy magtudlo sa ilang mga anak sa maayong pamatasan ngadto sa isi’g ka tawo kay matudlo na gyud kini og balik diha sa mga tunghaan.

Matudloan usab sila unsaon paghigugma ug pagrespeto sa ilang kaugalingon, sa mga ginikanan, sa ubang tawo. Tudloan silang maghunahuna, mopatigbabaw kun unsay matarong ug supakon ang hiwi, ug ingon man pagmahal sa nasud.

Mga hiyas nga kuwang-kuwang na karon sa pipila ka mga kabataan sa kasamtangang henerasyon. Unsa may kalainan sa masuso sa kaniadto ug sa karon? Wala.

Busa ang rason nga “moderno,” o “lahi na” ang kabataan karon, pasangil nalang sa mga ginikanang tapolan motudlo sa mga anak.