Buta sa kwarta

Gipalawman sa mga opisyal sa Cagayan ang suba sa maong pr obinsiya kay ilang nahuna-hunaan ang pagbanhaw sa ilang pantalan.

Tungod niini ilang gitugotan nga makakuha og bas ilawom sa suba ang mga langyaw nga barko ug ang mga bas nga nakuha gibaligya sa Hong Kong diin mikita sila og dolyar.

Sa tan-aw nako dugay nang nagsigi og kuha og bas ang mga langyaw nga barko sa suba sa Cagayan tungod kay apil naman sa nalawom ang mga umahan sa kilid sa suba nga dili na nimo makita.

Ang mga mag uuma nangreklamo na sa nahitabo sa ilang umahan tungod kay pulos na kini tubig hinungdan nga wala na sila makapananom.

Basi sa akong nakita sa balita sa 24 Oras sa GMA 7 tulo na lang ka punoan sa lubi ang nakita nga nagbarog sa dapit nga gihulagway sa mga mag uuma nga ilang umahan.

Ang pagkahimo nga suba sa umahan dili ni mahimo sulod sa mubo lamang nga panahon. Dili usab kini mahitabo kon may nagbantay pa ug nagmonitor sa gihimong pagpalawom sa suba.

Ang pagkahimong suba sa mga umahan nga nahimutang sa kilid sa suba buhi kini nga makatuoran sa dako nga pagpabaya sa mga opisyal sa Cagayan.

Hinuon ang pagpabaya pwede natong madawat kun bunga lamang kini sa kakuwang sa pagtan-aw ug pagmonitor sa gihimong pagpalawom sa suba.

Ang dili puwede nga madawat mao ang pagtuo nga gituyo ang pagpabaya tungod sa kuwarta nga nadawat sa mga opisyal (kun aduna man) nga maoy nakaaghat sa pagpiyong sa ilang mga dagkong mata nga nagsiga pero wala makakita.

Yuna pa, ang pagbutang gyud kaha og pantalan ang unang katuyoan sa mga opisyal sa Cagayan sa pagpalawom sa suba?

O basin rason lamang kini aron mahimong adunay gamay nga pagkalihitimo sa ilang panapi?