Himsog nga panglawas taliwala sa katigulangon

Usa nako kasuod nga higalang senior citizen mihangyo kanako nga hisgutan nato pag-usab dinhi kadtong mahitungod sa healthy ageing kon kining pagpabiling kahimsog sa panglawas taliwala sa katigulanon.

Matud pa uyon siya sa panganti sa ubang senior citizen nga ang pagpakatigulang wala kini magpasabot nga maluya na ang tawo ug dili na makabaton og himsog nga panglawas.

Maoy hinungdan nga akong ibalik o i-reprint dinhi kadtong atong nahisgutan mahimo gihapon nga magpabiling himsog usa ka senoir citizen.

Sa tuig 2014, ang World Health Organization (WHO) milusad sa kampanya pag-promote sa healthy aging ug paghatag og global priority ngadto sa panginahanglan sa mga senior citizen.

Nindot. Ug nakita nga kusog ang pagsaka sa pagdaghan sa mga senior citizen, apan nakita usab nga: “while people are living longer, they are not necessarily healthier.”

Tinuod, dili kinahanglan nga magpakisayod kita sa kahimtang panglawas sa mga senior citizen sa tibuok kalibutan. Dinhi sa atong tugkaran, atong makita nga daghan kanato ang nawad-an na sa kahimsog nga panglawas.

Tuyo sa WHO nga kahatagan kini sa unang mga pagtagad. Hinuon, dinhi sa atong nasud, aduna nay mga lakang ang national ug ubang mga local government units nga nag-atiman sa panglawass sa mga senior citizen, ilabina na ang mga indigent senior citizens. Apan, dako pa’g kakulangan kining gipakita sa atong gobiyerno nga pagtagad ngadto sa mga senior citizen.

Akong usbon, ang hagit mao nga unsaon nga magpabiling himsog ang mga senior citizen. Lisod ni tungod kay ang mga senior citizen, gumikan sa kahimtang panglawas, vulnerable kaayo, daling mataptan sa sakit.

Apan, matud ni Florangel Rosaro Braid: “But governments are poorly prepared to meet the challenges that will be brought about by this demographic change. The elderly is the eight poorest sector of the country.”

So, dili hingpit ang pagpangandam sa mga gobiyerno sa tibuok kalibutan pag-atubang ning maong hait for a healthy aging. Sa tibuok kalibutan, giingon nga mga 80% sa mga senior citizen ang walay access sa mga pension benefits. Ug dinhi sa ato, diin kadaghanan sa mga senior citizen atua magpuyo sa rural areas, walay hingpit nga pagpahiamulos sa mga pribiliyo ug mga benepisyo nga gihatag sa gobiyerno.

Midason kita sa giingon ni Braid nga pipila sa mga aspirasyon ug panginahanglan sa mga senior citizen mao kining mosunod: how to remain healthy, physically, and spiritually (unsa may matabang sa gobiyerno niini?); how to be financially independent (lisud ni); how to be socially connected and establish new friendship (sayon ra ni-tambong lang sa mga meeting sa senior citizen); how to keep one’s self-work (pagsalig sa kaugalingon).

Ang resulta niini mao nga atong ma-achieve ang healthy ug active ageing sa mga senior citizen. Uban sa pagtabang sa atong gobiyerno mahimo nga magpabilin kitang himsog sa panglawas despite sa atong mga panuigon.

Arang-arang kita dinhi sa atong dakbayan kay dako kaayo’g ikatabang ang cash assistance gikan sa city hall nga maka-maintain kita sa maayo natong panglawas.

By the way, lagmit mapasar na sa Konseho ang budget allocation alang sa atong cash aid, diin bali na unyang duha ka bulan ang atong madawat.