Wa imbestigaha ang EJKs
Human naaprobahan sa United Nations Human Rights Council (UNHRC) ang resolusyon nga gisang-at sa Iceland sa pagsusi sa laktod nga mga pagpatay sa kaliboan ka gipasanginlan nga mga durugista sa tulo ka tuig na nga kampanya ni Presidente Rodrigo Duterte batok sa ilegal nga drugas, ni-insistir ang Malakanyang (human sa paghulga sa UNHRC ug mga nasud nga nipabor sa resolusyon) nga:
• Gi-imbestigar na sa kapolisan ug ubang ahensiya sa gobyerno ang mga panghitabo; ug
• Takos ang sistema sa hustisya sa paghusay sa ipasaka nga mga kaso ug pagsilot sa mga responsable.
* * *
Bisan ang mga sakop sa Senado nga mga alyado ni Presidente Duterte nipasabot nga inay huwaton ang UNHRC mga makasugod sa buwag nila nga imbestigasyon sa mga pasangil sa extra-judicial killings (EJKs) sukad niadtong Hulyo 1, 2016, angay nga ipakita dayon sa kapolisan ang sangpotanan sa mga imbestigasyon sa ilang mga operasyon ug sa paglihok sa giingon nga vigilante groups nga nisangpot sa kamatayon sa suspitsadong mga durugista.
Nga di lisod nga himuon. Apan nangugat man ang mga sinaligan ni Presidente Duterte nga di gyud ta magpa-imbestigar sa UNHRC?
* * *
Labing yano nga katin-awan nga wa tay ikapakita sa UNHRC ug ubang kalibotanon nga kahugpongan nga magsusi sa sibaw na EJKs.
Kay wa imbestigaha sa kapolisan bisan ang labing kadudahan nga mga patay.
Wa nila tarunga pag-imbestigar ang ilang mga operasyon nga nakapatay sa mga suspetsado.
Wa sab nila imbestigaha ang mga insidente sa patay sa mga sakop sa vigilante groups nga gidudahan nga mga polis ra sab.
* * *
Wa say imbestigasyon nga nahimo ang Commission on Human Rights (CHR) kay wa sila hatagi sa kapolisan sa gikinahanglan nga mga dokumento.
Ang mga nakakita sa laktod nga mga patay nahadlok sang mobarug tungod sa pagpangiyugpos sa kapolisan ug kainutil sa CHR.
Mao ni ang hinungdan ngano nga maihap ra sa tudlo ang mga kaso nga nakaabot sa mga piskaliya ug mga hukmanan.
Ug tungod sa hapit matag adlaw nga panghudlat sa presidente nga patyon ang tanang mobabag sa kampanya batok sa drugas, may mga piskal ug mga huwes nga mokumpisal nga ang pagtalaw sa mga saksi ug tagtungod sa mga biktima sa EJKs mananakod.
* * *
- Latest
