EDITORYAL - Usa ka dako matag text

Daghang mga bagulbol nga madungog gikan sa mga nigamit og cellphone tungod sa matud pa pagpangawat sa ilang loads sa mga telecommunication companies. Ang uban mao pa gani pag-load paggamit nila “zero balance” na.

Way bisan usa ka telco nga nakahatag og simple apan klarong eksplinasyon kabahin niini ngadto sa mga konsumidor.

Kay kun sila motubag teknikal kaayo ang ilang ipanulti nga dili masabtan sa mga yanong cellphone users sama sa mga namaligya og asin o lamas diha sa Carbon Public Market.  Reklamo sa uban, daginuton pa ilang kwarta kawaton pa gyud sa mga kawatan nga mga networks.

Dinhi sa Pilipinas ang short message service (SMS) dako kaayo og benepisyong nakuha ang mga cellphone users ilabi na sa mga dili kaayo kwartahan ug nagdaginot sa load kay mahal ang patak kun motawag kun itandi sa text nga tag piso ra kun sa parehong network ug mas mahal sa laing network.

Maayo kining giduso nga resolusyon ni Senador Imee Marcos nga himuong barato ang singil sa SMS kay sa pagkakaron mahal gihapon kini kun itandi sa ubang mga nasud.

Gusto ni Marcos nga balance ang business interests sa mga telcos ug ang serbisyong makuha sa mga konsumidor, dili ang mga telcos ra pirme ang nakasapi.

Ang resolusyon ni Marcos nag-awhag sa Department of Information and Communications Technology (DICT) nga himuong usa ka dako ang bayad sa matag text ilabi na nga wala may gastos ang telcos niini itandi sa paggamit sa data nga nigamit og internet.

Dinhi sa Pilipinas, sumala pa sa www.statista.com niadtong tuig 2017 niabot na og 70.9 milyones ang tiggamitan og cellphone dinhi. Kun kining tanan mopadala og text message kausa sa usa ka adlaw, mokita na ang tulo ka telcos og P70.9 milyones.

Unya dili lang man kausa mo text ang tawo sa usa ka adlaw. Hayaha sa mga telcos.