Problema ni Tommy

Dili ko makatuo nga miubos ang akong blood sugar nga kaniadto pwerte gyud nga taasa. Tiaw mo, miabot na gud og 270 ang akong blood sugar.

Ang maximum nga blood sugar kinahanglang dili gyud unta molapas sa 110, kay kon taas kaayo ang blood sugar nagpasabot nga miubos ang insulin sa imong lawas.

Katapusan nako nga pa-checkup kaniadtong Hulyo sa miaging tuig ug nagsabot mi sa akong doctor nga magkita mi inigka Oktubre, apan wala ko mobalik.

Nakabantay man tingali mo nga usahay magpa-video ko nga moinom og gi-blender nga insulin plant aron nga mous-os ang akong blood sugar.

Tulo ka dahon sa insulin plant i-blender uban sa hamabaw sa baso nga tubig, ug maoy imnon kada adlaw.

Kaniadtong Martes sa hapon, nagpa-admit ko kay grabe ang akong hilanat. Didto sa emergency room, gipasukod sa doktor ang akong blood sugar.

Wala ko makatuo dayon sa resulta kay giingnan ko sa hospital staff nga 120 ra ang akong blood. Actual test pa gani, wala pay fasting.

Busa kamong mga nag-antos sa tag-as kaayong blood sugar, dasigon ko kamo nga inom og insulin juice kay makatabang gyud ni nga mapaubos ang inyong blood sugar.

* * *

Maproblema na gyud karon si kanhi mayor Tomas Osmeña tungod sa pagpaguba niya sa iyang opisina.

Ang DILG Secretary nga si Eduardo Año miingon nga kinahanglang pamatud-an ni Osmeña nga iya kadtong mga butang nga iyang gipanguha gikan sa iyang kanhi opisina.

Buyno, ibutang nato nga si Osmeña makakuha og mga dokumento nga magmatuod nga gikan sa iyang bulsa ang kuwarta nga gigasto, ug ang uban, mga donasyon.

Nasulti na ra ba ni Osmeña sa publiko nga mga higala niya maoy nidonar sa mga pagpanindot sa iyang opisina kay wala siya hatagi og budget sa City Council.

Unsa kaha to, ang pagdawat ni Osmeña og donasyon may pagtugot sa City Council? Kuyaw og makasohan na usab siya og paglapas sa Code of Conduct and Ethical Standards for Public Officials and employees.

Wala man gud tingali mangonsulta si Osmeña sa iyang mga sinaligan sa wala pa siya mohukom nga ipaguba ang iyang opisina. Mao na kana karon ang resulta.

Unya, sa akong paniid, daghang mga dumadapig ni Osmeña ang wala gyud makagusto sa iyang gihimo.

Iya pa lang unta kadto nga gibilin ang iyang mga butang, ug magpatawag siya’g presscon aron ipahibalo nga sa walay kusmod itugyan niya ang opisina kang Labella, maluoy pa unta ang mga tawo.

Pero unsaon man, kon tawgon nimo si Osmeña kaniadto, bisan sa wala pa gani ang kampanya sa eleksyon, dili gyud motubag.