EDITORYAL - Term sharing sa pagka-speaker

Ug nitingog na gyud sa kataposan human sa pipila ka semanang kalibog diha sa Ubos Balaybalauranan kun kinsa ang mamahimong House Speaker si Pres. Rodrigo Duterte. Si Taguig-Pateros Rep. Alan Peter Cayetano maoy iyang gustong mamahimong lider sa mga kongresista sa pagbukas na unya sa 18th Congress karong Hulyo 22.

Ang pagtingog sa presidente maoy naghatag og tuldok sa panagtigi sa iyang mga kaalyadong kongresista nga maoy nag-ilog sa maong posisyon.

Ang gusto sa presidente mao ang House speaker nga mouyon ug motabang sa pagpasar sa iyang mga legislative agenda ug nag-una niini ang Charter Change ug ang pag-ilis unya sa sistema sa panggobiyerno sa nasud ngadto na sa Pederalismo.

Ang mga kongresista magbotasyon pa karong Hulyo 22 kun kinsa gyud maoy ilang gusto, apan naandan na sa kasaysayan sa Pilipinas nga kun kinsa ang giduso sa pangulo mao gyud kini ang botaran sa mga magbabalaod.

Nagpasabot kini nga si Cayetano na gyud maoy mamahimong House Speaker. Apan si Cayetano kinsa sakop sa Nacionalista Party apan kaalyado sa pangulo ug si Marinduque Rep. Lord Allan Velasco nga kapartido ni Duterte, magbahin sa termino.

Si Cayetano molingkod sud sa 15 ka buwan samtang 21 sab ka buwan si Velasco samtang si Martin Romualdez sa Leyte kinsa interesado sab mahimong speaker mao karoy majority floor leader.

Kini maoy lisud kun ang pangulo suportado og mga nagagikan sa nagkadaiyang partido nga pulos tanan nakatabang sa iyang kandidatora.

Tungod kay ang matag usa gikinahanglan sa pangulo panahon sa botasyon sa iyang mga gitinguhang papasaron nga mga balaudnon. Kun ang usa mangluod, mameligrong di kini kakuha og suporta kanila.

Bisan kinsa pay molingkod sa pagka House Speaker, basta ang importante ang interes sa kinabag-an ug sa nasud ang ilang lantawon dili kini magkaproblema.