Duna bay separation pay kun ang kawani ma-terminate?

Dear Atty. Divine:

Ang akong amiga na-involve sa kwestiyonableng transaksyon sa ilang kompaniya. Gipadad-an na siya og memo ug naglisud gyud siya sa pagtubag niini kay aware gyud siya nga sayup ang iyang gibuhat. Tungod niini, nabalaka siya nga ma-terminate  sa trabaho kay 10 years na siyang  nag-work sa maong company. Ang iyang pangutana kun ma-terminate siya duna ba siyay  madawat nga separation pay? Naglibog gyud  siya kun unsay iyang buhaton og nagplano sad siya nga mo-resign nalang. Unsay maayo niyang buhaton? — Jessa

Dear Jessa,

Ang usa ka empleyado mamahimo lang ma-terminate basi sa atong Labor Code kun dunay valid cause o basi sa authorized causes. Sa ato pa, ang usa ka empleyado mamahimo lang mataktak sa trabaho kun siya mapamatud-an human sa imbestigasyon nga dunay  dakong kalapasan nga nahimo apan kinahanglan nga moagi og due process. Sa kaso sa imong amiga nga gipadad-an na og memo kinahanglan gyud kini niyang  tubagon og ipasabot kun nganong nalambigit siya sa maong transaction. Kun siya mapamatud-an nga sad-an ug ang silot nga ipahamtang termination sa iyang employment  then wa gyud siyay madawat nga separation pay.  Kun mo-resign sad siya sa trabaho wa sab gihapon siyay makobra nga separation pay. Ang usa sa iyang option mao ang pagpakigsulti sa iyang HR ug paghangyo niini  nga hatagan siya og second chance.  Thanks and God bless.— Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.