Happy birthday

Hunyo 9, 2019: Domingo sa Pentekostes

Mga Pagbasa:  Buh. 2;1-11/Sal. 104/1 Cor. 12;3-7,12-13Jn. 20;19-23

Alang nako kini ang tukmang greeting nga akong mahatag sa matag higayon nga magsaulog kita sa Pentekostes. Sanglit ang pagsaulog sa Pentekostes mao man ang paghinumdom sa higayon nga gipahimugso ang Simbahan.  Ingon nga simbahan kita gihimong gilig-on ug gipainit sa kalayo sa Diosnong gugma diha sa Bayhon sa Dila nga Kalayo nga mikunsad sa mga tinun-an ug sa atong Mahal nga Inahan. Literally ang pulong Espiritu gikan man sa duha ka mga pinulongan. Kini gilangkoban sa Griyego ug Hebreo.

Sa Griyego gitawag kini og PNUEMAH sa Hebreo gitawag kini og RUAH nga dunay paghatag og emphasis sa gininhawa. Sa ato pa ang Espiritu nagpasabot man og Gininhawa. Ang tawo nga way kinabuhi way ginhawa ug ang si bisan kinsa nga baho og gininhawa dunay deperensiya o dili ba kaha daghan og toxic ang kalawasan. Mao nga bisan kun buhi dili gihapon healthy.

Sa atong pagsangpit sa Balaang Espiritu gipangayo nato ang usa ka kinabuhi nga dili lang moginhawa kondili kinabuhi nga fully alive ug mabulukon.

Sa atong pagsangpit sa Espiritu  Santo kita nangindahay nga iya kitang giyahan aron atong kinabuhi subay sa iyang lamdag ug kainit. Sa panahon karon bisan pa man kun taas kayo ang temperature apan nagpabiling bugnaw ang tawhanong pagpakabana sa usag usa.

Nahimo kitang buta, bungol nga dunay kinabuhi nga kanato nagpalibot sanglit gihunahuna raman nato ang atong kaugalingong kinabuhi. Ang gugma nahimong daw nindot paminawon apan lisud kaayo ipahamtang. Ang kainit sa pagbati nahimong patay diha sa tawhanong kalambigitan.  Ang kinabuhi gihulipan sa kamatayon. Ang paglaum gihulipan sa kawalay kapaingnan ug ang kahayag gihulipan sa kangitngit. Ang kinabuhi nahimong daw monotonous ug kabahin na lang sa relational robotics.

Sa atong pagsangpit sa Balaang Espiritu atong pangayoon nga unta kita mamahimong mainit sa iyang pasalig ug giya nga bisan pa man kun ang atong kinabuhi puno man sa kasakit anaa siya nga kanato molig-on. Kini ang atong iampo karon:

UMANHI KA O ESPIRITU SANTO PUN-A SA KALAYO SA IMONG GUGMA

ANG MGA KASINGKASING SA IMONG MGA ALAGAD

IPADALA ANG IMONG ESPIRITU UG MAMUGNA SILA UG BAG-OHON MO ANG DAGWAY SA YUTA…. Amen.

Happy birthday kanatong tanan ingon nga simbahan!