MRA, desenting tawag sa scavenger

Naandan nga tawag sa mga tawong nanginabuhi sa basurahan mao ang basurero o basurera, scavenger sa ininglis pa.

Kini ilabi na kun makaadto ka sa mga landfill o dump site sama sa Inayawan diin daghang mga kaigsoonan ang mangalkal og basura dayon ipatimbang.

Mao kini ang nagbuhi sa ilang pamilya sulod na sa hataas nga panahon apan sagad sa ubang mga tawo ubos ang pagtan-aw sa ingon niini nga matang sa panginabuhi.

Kung buot hunahunaon dako sila og gikatabang sa paghipos sa mga basura, pag recycle kay kadtong ilang nakolekta ila man sad mabaligya sa junk shop aron maproseso ug magamit pag-usab.

Aniay usa ka waste facility o pribadong landfill sa Barangay Binaliw ang mihatag ug dakong importansya sa mga scavengers nga gihatagan nila og desenting estado.

Ang mga basurera/basurero gikan sa Inayawan ug ubang dapit gisagop nila ug gihatagan og trabaho.

Dili scavenger kon dili MRA o Material Recovery Attendant ang tawag nila sa mga kanhi scavengers.

Susama ra gihapon ang ilang trabaho nga mangaykay o tigpili sa mga basura nga magamit pa.

Ang makuha nilang basura ang facility na ang mopalit, apan labaw sa ilang kita sa makolektang basura, naa silay minimum nga suholan kada adlaw.

Gawas sa sweldo naa pa silay mga benepisyo sama sa mga empleyado, doble ang ilang kita.

Gilibre usab ang ilang pagpuyo sa usa ka bunkhouse sa MRF Facility.

Matud sa tagdumala sa waste facility nga dako og natampo ang mga MR Attendants sa hapsay nga paghipos sa mga basura busa angayan lang hatagan usab sila og makatawo o humane nga pagtagad.