Dili mahimong magpakasal kun wa pa ma-annul

Dear Atty. Divine;

Ang akong boyfriend usa ka OFW, duna na siyay pamilya sa Mindanao but nagbuwag na daw sila before mi nag-meet. Ang iyang mga anak naa sab sa iyang kanhi asawa ug iya kining gisuportahan. Nagplano mi nga magminyo karong January. Apan posibleng masangit mi sa CENOMAR kay mo-appear man gyud ang iyang first marriage. Ang akong pangutana kun unsay angayan namo nga buhaton aron mi makapakasal?Pwede ba nga mo-execute lang mi og Affidavit  of Cohabitation? Daghang salamat. —Jessica

Dear Jessica:

Dili gyud mo mamahimong makapakasal sa sunod tuig samtang dili pa ma-annul ang first marriage nga gisudlan sa imong boyfriend. Bisan pa kun mo-execute mo og Affidavit of Cohabitation aron ma-exempt mo sa pagkuha og Marriage License mamahimo gihapong void ang inyong marriage tungod kay makonsiderar kining Bigamous marriage tungod kay gipahigayon kini samtang nag-exist pa ang previous marriage.  Mamahimo sab ikaw nga maapil sa pagpasaka og kasong Bigamy tungod sa imong pagpakasal kaniya bisan kun nasayud ka nga minyo na siya so peligro hinuon nga mag-atubang mo og kasong kriminal. Busa ang maayong buhaton sa imong boyfriend mao ang pagpa-annul una sa iyang previous marriage una siya mosud og laing kaminyuon kay mapagan gyud ka sa iyang problema kon dili mo mosubay sa legal nga paagi. Thanks and God bless. —Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.